2026 оны хөлбөмбөгийн ДАШТ-ий урьдчилсан шатнаа Луис Диаз таван минутад хоёр гоолыг оруулж, Колумбчууд хүчирхэг өрсөлдөгч Бразилийн багийг 2:1-ээр хожлоо.
Харин Бразилчууд хоёр тоглолтод дараалан хожигдоод байна.
Тоглолтын хувь заяаг шийдсэн Луис Диазын хувьд, ойрмогхон амаргүй цаг үеийг даван туулсан билээ. Түүний аав, ээжийг зэвсэгт этгээдүүд барьцаалсан нь Колумб даяар сэтгэл түгшээсэн хэрэг байлаа. Ээжийг нь цагдаа нар нэн даруй аварсан ч, аав нь харин 12 хоногийн хойно суллагдсан юм.
Бразилийн эсрэг тоглолтод барьцаалагчдын гараас саяхан чөлөөлөгдөөд буй Лиус Диазын аав хүрэлцэн ирж, хүүгээ гоол оруулсны дараа ялалтын баярыг сэтгэл хөдлөл өндөртэйгээр тэмдэглэсэн юм.
2015 оноос хойш анх удаагаа Бразил болон Аргентинчууд хөлбөмбөгийн ДАШТ-ий урьдчилсан шатнаа нэг өдөр хамтдаа хожигдсон нь энэ өглөө тохиолоо.
Харин Колумбын шигшээ ДАШТ-ий урьдчилсан шатнаа Өмнөд Америкийн бүс дэх хожигдолгүй цорын ганц баг болж үлдлээ. Тэд таван тойргийн дараах байдлаар хэсгийнхээ гуравдугаар байрт бичигдэж байгаа юм.
