1 мин

'The Trial of the Chicago 7' киног 48 цагийн турш YouTube-т үнэгүй тавихаар болжээ

Б.Саруул 2021.02.19

Netflix хоёрдугаар сарын 19-ний баасан гарагаас эхлэн 'The Trial of the Chicago 7' киног 48 цагийн турш YouTube-т үнэгүй байршуулахаар болсон байна.

1968 онд Вьетнамын дайныг эсэргүүцсэн долоон иргэнийг хуйвалдаан явуулсан, Ардчилсан намын үндэсний чуулган дээр үймээн самуун дэгдээсэн гэх хэрэгт буруутган баривчилснаар тус киноны үйл явдал эхэлдэг.

Түүхэн үйл явдлыг харуулсан энэ киноны зохиолыг Аарон Соркин 2007 онд бичиж, Стивен Спилбергийг найруулагчаар ажиллуулах бодолтой байжээ. Гэвч 2007 онд гарсан дэлгэцийн уран бүтээлчдийн жагсаал, киноны төсөвтэй холбоотой асуудлаас болж Спилберг энэ кинонд ажиллахаас татгалзжээ. Ийнхүү хойшлогдсоор 2018 оны аравдугаар сард Соркин өөрөө найруулагчаар нь ажиллахаар болж, кино зураг авалт эхэлсэн юм.

Мөн тус бүтээл шилдэг эрэгтэй туслах дүр, шилдэг кино зохиол гэх мэт хэд хэдэн номинацид нэр дэвших магадлалтай хэмээн кино шүүмжлэгчид таамаглаж байна.

Энэхүү түүхэн шүүх хурлын 51 жилийн ойг тохиолдуулан киног үнэгүй үзүүлэхээр болсон гэж зохиолч, найруулагч Аарон Соркин мэдээлжээ. 'The Trial of the Chicago 7' кино өнөөдрөөс эхлэн Netflix-ийн YouTube сувгаар цацагдах болно.

Дашрамд дурдахад, Netflix өнгөрсөн жил 34 шилдэг баримтат киног YouTube-д үнэгүй оруулж байсан билээ. Хэрэв эдгээр киног үзэх бол ЭНД дараарай.

Холбоотой мэдээлэл: ОСКАРЫН ТААМАГ ба амжиж үзэх 10 кино

Netflix шилдэг баримтат кинонуудаа YouTube-д оруулжээ