Цаг хугацаа үнэхээр хурдан өнгөрөх ажээ. Саяхан бид хөнгөн жингийн барилдаан үзээд Б.Баасанхүүгийн медальд баярлаад сууж байсан бол нэг мэдэхэд хамгийн хүнд жингийн барилдаан хүрээд иржээ. Францын төдийгүй жүдогийн ертөнцийн гол од Тедди Ринер барилдах боллоо. Нутгийн эзэд одоо болтол жүдогоор алтан медаль байхгүй байгаа. Романа Дикко, Тедди Ринер хоёр заавал алтан медаль авахын төлөө үхэн хатан зүтгэх нь дамжиггүй.
А хэсэг Татароглу – Маринич барилдаанаар эхэлнэ. Ялсан нь отгон дэлхийн аварга Ким Минжон дээр очих юм. Дараа нь хашир туршлагатай хоёр бөх үзэлцэх нь Азербайжаны Кокаури, Бразилын Сильва хоёр. Давсан нь 2023 оны Европын аварга Мартти Пуумалайнентай барилдах эрх авна.
В хэсэгт дэлхийн аварга Энди Гранда Монакогийн Гадеу Марвинтай таарсан. Энд хамгийн сонирхолтой нь олимпын хошой аварга Лукаш Крпалек, Японы удамт бөх Тацүрү Сайто нарын тулаан. Энэ жил хэтэрхий сайн формтой байсан Оросын Инал Тасоеваас эмээсэн хүнд жингийнхэн сугалаагаар түүнтэй таарахгүй гэж хөглөцгөөсөн. Тедди хүртэл Иналаас зугтаж, Африкийн нээлттэй тэмцээнд чансааны зуухан онооны төлөө очиж байлаа. Сайто ч адилхан. Олимпоос өмнөхөн Өмнөд Америкийн тэмцээнд очиж, чансааны 100 оноо аваад Иналаас өөр хэсэгт орох нь хэмээн баярлаж байлаа. Тэдний аз болоход Олон улсын жүдо бөхийн холбооноос Инал Тасоевт олимпод орох эрх өгөөгүй тул наадмын таавар бүр мөсөн будлиантаж, Крпалек Сайто хоёр нэг хэсэгт орсон түүхтэй.
Хамгийн тэнцүүхэн хэсэг бол С. Манай О.Цэцэнцэнгэл эхлээд Германы Эрик Абрамовтой таарсан. Барилдааны харьцаа 1:0 манай бөх илүү. Ялсан нь хэсгийг тэргүүлэгч Тажикстаны Тимур Рахимовын аманд очно. Узбекистаны Алишер Юсупов хэсгийн аваргын төлөө гарч ирэх болов уу.
D хэсэгт олимпын 3 дахь алтан медалиа авахаар зорьж буй Тедди Ринер. Шүүгч нар нутгийн эздэд туслаад байгааг Парисын татами нэг бус удаа харсан. Тэрээр Магомедомаров, Лили хоёрын ялсныг хүлээж байна. Хагас шигшээд шалгарахын тулд Тедди Гүржийн Гурам Тушишвилиг давах шаардлагатай. Нас ахисан баавгайнаас айдаг хүний тоо цөөрсөөр байгаа ч Гурам шүүгчтэй бас барилдах хэрэгтэй болно.
Хагас шигшээд: Ким Минжон – Сайто Тацүрү, Тимур Рахимов – Тедди Ринер.
