Өчигдөр Парисын олимпын сонгомол барилдаан, чөлөөт бөхийн тэмцээний анхны медальтнууд тодорсон билээ. Бөх сонирхогчдын анхаарлыг эмэгтэй 50 кг-ын жингийн барилдаан ихэд татаж байлаа. Энэ жинд манай гол найдварын нэг Д.Отгонжаргал барилдсан юм.
Д.Отгонжаргалын эхний учраа Италийн тамирчин Эммануэла Льюззи жингээр хасагдсан тул манай тамирчин шууд ялалт авсан. Гэхдээ энэ нь ч бас нэг их сайн зүйл биш байлаа. Учир нь анх удаа олимпод барилдаж байгаа бөхийн хувьд эхний барилдаандаа сэтгэл хөдлөлөө гаргаад дараад авсан нь дээр байдаг. Дараа нь Азербайжаны хашир туршлагатай, ахмад бөх Мария Стадникийг 4:4 харьцаатай буюу онооны чанараар ялж, шөвгийн 4 үлдлээ.
Дараагийн өрсөлдөгч нь АНУ-ын Сара Хильдебрандт байлаа. Манай тамирчин түүнийг өмнө нь учраа олдохгүй болтол нь сандаргаж, илт давуу ялж байсан. Харин энэ удаад эсрэг багтаа тун сайн судлуулсан байлаа. Сара урт мөчөө ашиглан, 5:0 ялж, манай бөхөд оноо авах боломж өгсөнгүй. Ийнхүү Д.Отгонжаргал хүрэл медалийн төлөө дагах барилдаанаас гарч ирсэн бөхтэй өрсөлдөх боллоо.
Энэ жингийн гол сенсаац бол олимпын аварга, дэлхийн 3 удаагийн аварга Юи Сүсаки эхний тойрогтоо Энэтхэгийн Винешт 2:3 ялагдсан. Олон улсын тэмцээнд анх орсноосоо хойш гадаад бөхөд ялагдаагүй байсан тэрээр гадаад бөхөөс анхны ялагдлаа хүлээж, өнөөдөр дагах барилдаанд гарах болсон.
Медалийн төлөөх барилдаанууд өнөөдөр 01:30 цагаас эхлэх юм.
Өнөөдөр алтан медалийн төлөө барилдах бөхчүүд
Сонгомол
77 кг. Нао Күсака (Япон) - Демеу Жадраев (Казахстан)
97 кг. Артур Алексанян (Армени) - Мохаммадхади Сарави (Иран) -
Эмэгтэй 50 кг
Винеш (Энэтхэг) - Сара Хильдебрант (АНУ)
Гэрэл зургийг Д.Нямбилэг
