Өнгөт арьст балетчидын замыг нээгч, Харлем театрын гоцлол бүжигчин Микаэла ДеПринс энэ сарын 13-нд насан эцэс болжээ. Тэрээр дөнгөж 29 настай байлаа.
Хэвлэлийн төлөөлөгч нь үхлийн шалтгааныг дурдаагүй ч “эмгэнэлтэйгээр, гэнэт” гэсэн үгийг эмгэнэл дээрээ ашигласан байлаа.
Микаэла ДеПринс бүсгүйн амьдралаар кино хийхэд болохоор. Тэрээр Сьерра-Леонд иргэний дайны үеэр төржээ. Аав нь дайнд амь үрэгдсэн бол ээж нь өлсгөлөнгөөр энэ хорвоог орхисон. Багад нь түүнийг арьсан дээрх мэнгэ, толбоноос нь болж, чөтгөр, шулам хэмээн ад үздэг байлаа. Хорогдох байранд амьдарч байсан ч ад үзэгдсээр бараг л гудамжинд аж төрж байв. Харин нэг удаа түүний амьдралд гэрэл гэгээ гийсэн нь балет байв. Хогийн сав дотроос олсон хуучин сэтгүүлийн хавтсан дээрх балетчин эмэгтэйн гэрэл зургийг хараад ДеПринс балет бүжиглэх гэсэн мөрөөдөлтэй боллоо. Гайхалтай нь түүний мөрөөдөл биелсэн юм. Хэдэн жилийн дараа охиныг АНУ-ын Нью-Жерсигийн гэр бүл өргөж авав. Энэ азтай тохиолдол охинд аз жаргал авчрах хувьтай байжээ. Өргөж авсан ээж нь охиноо балетад дуртай болохыг ажиглаад дугуйланд оруулав.
Дунд сургуулиа төгсөөд ДеПринс алдар хүндийн замд орсон. Тэр Харлем театрын түүхэн дэх хамгийн залуу гоцлол бүжигчин болж, дэлхийн бүх том театрын тайзнаа гарсан. Бейонсе-гийн “Lemonade” клипт тоглож, Мадоннагийн шоунд уригдав. 2021 онд алдарт Бостон театрт бүжиглэлээ. Дайн дажинд хохирсон болон хүчирхийлэлд өртсөн хүүхэд багачуудын эрхийг хамгаалахын төлөө тэмцдэг байлаа.
“ДеПринс бол ямар ч бэрхшээл тулгарсан, хичээж зүтгэвэл мөрөөдөлдөө хүрч болно гэдгийг олон хүнд харуулсан, хүүхэд багачуудын үлгэр жишээ болсон хүн байлаа” гэж эмгэнэлд дурджээ.
