Ирэх намар Саудын Арабт болох сагсан бөмбөгийн Азийн цомын тэмцээний урьдчилсан шатны 3, 4-р тойргийн тоглолтууд энэ сард явагдана. Монголын шигшээ баг тус тэмцээний урьдчилсан гуравдугаар шатны “С” хэсэгт Япон, Хятад, Гуамын шигшээтэй өрсөлдөж байгаа билээ.
Манай шигшээ арваннэгдүгээр сарын 21-нд Японы талбайд зочилж тоглох бол арваннэгдүгээр сарын 24-нд Улаанбаатар хотноо Хятадын эсрэг хүч сорих хуваарьтай байна.
Японы Үцүномиягийн “Nikkan Arena Tochigi”-д явагдах Япон, Монголын тоглолтын тасалбар бүрэн зарагдаж дууссан байна. 5000 хүний багтаамжтай тус цэнгэлдэхэд 2023 онд Зүүн Азийн супер лигийн тэмцээн явагдаж байсан юм.
Монголтой хийх тоглолтод оролцох бүрэлдэхүүнд НБА-д тоглож байсан Юта Ватанабэ болон Юки Тогаши, Жош Хокинсон нарын шилдгүүд багтжээ.
