БНСУ-ын алдарт BIGBANG хамтлаг энэ сарын 23-нд Японы Осака хотын “Kyocera Dome” ордонд болсон “2024 MAMA Awards” шагнал гардуулах ёслол дээр нэгдэн дуулж, фэнүүдийнхээ зүрхийг хөөргөж, сэтгэлийг амраалаа. БНСУ-ын хэвлэлээр тус ёслолын хөтөлбөрт G-Dragon ганцаараа шагнал хүртэнэ, хамтлагийн тоглолт бичигдээгүй байна гэх зэргээр бичиж, үнэнч бишрэн шүтэгчид нь цуурхал, үнэн эсэхийг амьсгал даран хүлээж байлаа.
Тиймээ, G-Dragon долоон жилийн дараа “MAMA Awards” шагнал хүртсэн. Гэхдээ ёслолын сүүлийн өдөр BIGBANG хамтдаа тайзан дээр гарч ирсэн нь үнэхээр ордныг буулгах шиг боллоо. Эхлээд тэр “Untitled, 2014”, “POWER” дуунуудаа толилуулсан.
Дараа нь Тэян, Дэсон хоёр гарч ирэн, BIGBANG хамтлагийнхаа бараг домог болсон “BANG BANG BANG”, “Fantastic Baby” дуугаа дууллаа.
Үзэгчид төдийгүй хүрэлцэн ирсэн алдартай зочид ч нэг мэдэхэд “BIGBANG” хэмээн алга ташин, уухайлж байв.
