Хүн бүр бусдаас хайр мэдрэхийг хүсдэг. Гэвч зарим үед бид өөрсдийгөө "хайрлагдахад хэцүү" хүн мэтээр мэдэрч, бусдад төвөг уддаг, хангалттай сайн биш юм шиг санагддаг. Энэ мэдрэмж нь биднийг ганцаардмал, ойлгогдохгүй мэт болгож, бусдаас холдуулж орхих тохиолдол цөөнгүй.
Гэвч үнэн гэвэл, хүн бүр хайрлах, бас хайрлагдах үнэ цэнтэй. Өөрийгөө хайрлахад хэцүү санагдаж байгаа тэр үед л бидэнд хамгийн их хайр, энэрэл шаардлагатай байдаг.
Энэхүү нийтлэлдээ өөрийгөө "хайрлагдахад хэцүү" гэж мэдэрч эхэлсэн үедээ ойлгох ёстой гол зүйлсийг хүргэж байна. Өөрийгөө хайрлах аялалд тань багахан ч гэсэн тус хүргэнэ гэж найдаж байна.
1. Таны үнэ цэн бусдын хандлагаас хамаарахгүй
Хэн нэгэн таныг ойлгохгүй, хайрлахгүй байна гэдэг нь таны үнэ цэн багассан гэсэн үг биш. Өөрийгөө "хайрлагдах эрхгүй" мэт мэдрэх нь ихэвчлэн гаднын хүчин зүйл, шүүлтээс үүдэлтэй байдаг. Бусдын үгээр өөрийгөө бүү дүгнээрэй.
2. Өөрийгөө "хайрлагдахад хэцүү хүн" гэж бодох нь хуучин шархаас үүдэлтэй байж болно
Бага насандаа эсвэл өмнөх харилцаандаа хайр, халамж дутуу мэдэрсэн бол та өөрийгөө үүнийг хүртэх эрхгүй гэж бодож эхэлж магадгүй. Гэхдээ энэ нь бодит байдал биш, харин өнгөрсөн туршлагаас тань үлдсэн сүүдэр юм. Өөрийгөө буруутгах биш, эдгэрэх зам руу тэмүүлэх нь чухал.
3. Хүн бүр өөрийн гэсэн хайрын илэрхийлэмж болоод хүлээж авах өвөрмөц арга барилтай
Зарим хүмүүс хайр, халамжийг үг, тэврэлтээр илэрхийлдэг бол зарим нь нууцхан үйлдлүүдээрээ харуулдаг. Магадгүй та хайрлагдаж байгаа ч түүнийг анзаарахгүй байж болно. Тиймээс өөрийгөө хайрлагдахад хэцүү хүн гэж дүгнэхээсээ өмнө хайр, халамжийг хэрхэн хүлээж авах хандлагатайгаа ажиглаарай. Танд юу илүү дотно, дулаан мэдрэмж төрүүлж байна вэ?
4. Өөрийгөө хайрлаж чадвал бусдын хайрыг хүлээж авахад илүү амар болно
Өөрийгөө хайрлаж сурах нь бусдад илүү их хайр өгөх, бас хүлээж авах чадамжийг нэмэгдүүлдэг. Бусдаас байнга хайр гуйх биш, өөрийнхөө үнэ цэнийг мэдэрч, өөртөө энэрэнгүй хандах нь чухал.
5. Хайр бол зөвхөн бусдаас ирдэг зүйл биш, өөрийн дотроос эхэлдэг
Бусдын хайр, хүлээн зөвшөөрлийг хэтэрхий их хүсэх үед өөрийн дотоод ертөнц рүүгээ харах хэрэгтэй болдог. Та өөрийгөө хайрлаж, өөрийгөө хүлээн зөвшөөрөх үед бусдын хайрыг хүлээж авахад илүү хялбар болно.
6. Зарим хүмүүсийн танд өгч чадах хайр хязгаартай байдаг
Бид өөрсдийнхөө үнэ цэнийг бусдын хандлагаар хэмжих гээд байдаг. Гэвч зарим хүмүүс зүгээр л таныг хайрлах сэтгэл зүрхгүй, эсвэл хайр илэрхийлэх арга барил дутмаг байж болно. Энэ нь таныг хайрлахад "хэцүү" гэсэн үг биш, харин зөв хүмүүсийг олох л хэрэгтэй гэсэн үг.
7. Бусад хүмүүсийн хайр танд яг одоо дутагдаж байгаа мэт санагдаж болно, гэхдээ та ганцаараа биш
Өөрийгөө хайрлагдаагүй мэт мэдрэх үед ихэнх хүн өөрийгөө ганцаараа зовж байгаа гэж боддог. Гэвч энэ мэдрэмжийг олон хүн тээж явдаг бөгөөд та ганцаараа биш. Энэ тухай хэн нэгэнд (найз, сэтгэл зүйч, итгэдэг хүн) ярьж, сэтгэлээ нээх нь тус болох магадлалтай.
8. Бага насны туршлага, гэр бүлийн орчин таны хайр хүлээж авах чадварт нөлөөлдөг
Хэрэв та багадаа хайр, халамжийг төдийлөн мэдрээгүй бол насанд хүрээд хайр хүлээж авахад хүндрэлтэй байдаг. Гэхдээ энэ нь өөрчлөгдөж болно. Өнгөрсөн туршлага таны ирээдүйг тодорхойлох албагүй. Бага багаар өөрийгөө нээж сурах хэрэгтэй.
9. Төгс байх шаардлагагүй – танд хайрлагдах эрх бий
Хайрыг хүртэхийн тулд "сайн хүн", "төгс хүн", "өөрчлөгдсөн хүн" байх ёстой мэт санагддаг уу? Үгүй ээ. Та яг энэ хэвээрээ, ямар ч алдаа дутагдалтай байсан, маш их хүндрэлүүдтэй нүүр тулж, ойлгогдохгүй байдалд хүрсэн байсан ч хайрлагдах эрхтэй хүн.
Та үнэ цэнтэй, хайрыг хүртэх бүрэн эрхтэй гэдгээ хэзээ ч битгий мартаарай. Өөрийгөө хайрлаж, өөртөө энэрэнгүй хандаарай.
