“Аль-Насср” клуб 2025 он гарснаар эхний тоглолтоо “Аль-Охдоод” багийн эсрэг хийлээ. Пүрэв гарагт Про лигийн 14-р тойргийн хүрээнд явагдсан эл тоглолтод тэд өрсөлдөгчөө 3:1 харьцаатайгаар буулгаж авсан юм.
Садио Мане дубль толилуулсан бол Криштиано Роналду торгуулийн цохилтоо амжилттай гүйцэтгэж, дараалсан 24 дэх жилдээ мэргэжлийн хөлбөмбөгт гоол бүртгүүлсэн.
Том ахын анхны гоолыг бид тэртээ 2002 оны аравдугаар сард “Спортинг”-ийн өмсгөлтэйгээр “Морейренсе” багийн хаалганд оруулахад нь хөндлөнгөөс гэрчилж байсан.
Тэрбээр “Спортинг”, “Манчестер Юнайтед”, “Реал Мадрид”, “Ювентус”, “Аль-Насср” клубүүд болон Португалийн шигшээ багийн төлөө нийтдээ 900 гаруй гоол оруулаад байна.
“Аль-Насср” клуб өдгөө Про лигийн гуравдугаар байрт бичигдэж байгаа юм. Гэвч хүснэгтийг тэргүүлэгч “Аль-Иттихад” багаас тэднийг 8 оноо зааглаж байна.
Роналду энэ улиралд Про лигийн 13 тоглолтод оролцохдоо 11 гоол оруулж, 2 гоолын дамжуулалт бүртгүүлээд буй.
