Өнгөрч буй энэ 7 хоногт эх оронд маань ямар үйл явдал болж өнгөрөв?
1-р сарын 13, Даваа гараг
-Хотын дарга Х.Нямбаатар Улаанбаатар Метро төсөлд Английн Засгийн газар баталгаа гаргахаар болсон гэдгийг мэдэгдлээ. Харин БНСУ-ын “Духуа инженеринг” метроны ТЭЗҮ-ийг эцэслэн боловсруулах инженер, геологийн ажлыг 2-3 үе шаттай гүйцэтгэх юм.
-Монгол Улсын Гавьяат тамирчин, мэргэжлийн боксчин Э.Цэндбаатар хэвлэлийн бага хурал хийлгэж, 2025 оны хоёрдугаар сарын 15-ны өдөр WBA Asia аваргын бүсээ хамгаалах тулаан хийх болсноо зарлалаа. Тэмцээн АСА аренад явагдах юм.
-Нийслэлийн эрүүл мэндийн газраас томуу, томуу төст өвчний тархалтын түвшин буурч, эмнэлгийн ачаалал хэвийн болсныг зарлалаа.
- Шинэ үндсэн хууль батлагдсаны 33 жилийн ойд зориулсан улс, аймаг, цэрэг, сумын цолтой 128 бөхийн барилдаан болж, Намсрайжавын Батсуурь дархан аварга цолтойгоор анхны түрүүгээ гардав.
1-р сарын 14 Мягмар гараг
-Японы баруун өмнөд эрэгт 6.9 магнитудын хүчтэй газар хөдлөсний улмаас тус улс дахь Японы ЭСЯ-наас монголчуудад хандан, сэрэмжлүүлэг гаргалаа.
-Үндэсний статистикийн хорооны мэдээгээр улсын хэмжээнд 2024 онд 57.3 мянган эх амаржсан нь өмнөх оноос 6.6 мянга буюу 10.3 хувиар буурсан үзүүлэлт байлаа.
- Засгийн газрын өргөтгөсөн хуралдаанд 21 аймгийн Засаг дарга нар оролцож, “Малчид өвөлжилтийн бэлтгэлээ маш сайн хангасан" гэдгээ илэрхийлэв.
1-р сарын 15 Лхагва гараг
-“Carplate” системээр машины улсын дугаарын захиалга авч эхэллээ. Тухайн машиныг 100 хүртэл оноогоор үнэлж, эрэмбээр улсын дугаар олгох юм.
-“Хурд” хамтлаг "Бүсгүй" уран сайхны киноны орлогоосоо хөдөө орон нутгийн эмнэлгүүдийн нярайн тасагт төхөөрөмж бэлэглэхээ зарлав. Тус киног Л.Базарсад найруулж, гол дүрүүдэд Г.Ариунболор, С.Ариунбямба нар тогложээ.
-Италийн Турин хотод болж байгаа Дэлхийн оюутны спортын өвлийн XXXII Универсиад наадамд манай улсаас спортын 5 төрөлд 12 тамирчин хурд хүчээ сорьж байна.
- “Хорт хавдрын бай эмчилгээнд шинэ ололтыг нэвтрүүлье” сэдэвт бага хурал болж, хорт хавдрын эмчилгээний орчин үеийн чиг хандлага, өөрчлөлт, шинэчлэлтийг танилцууллаа.
1-р сарын 16 Пүрэв гараг
- Монгол Улсын Ерөнхийлөгч Ухнаагийн Хүрэлсүх Бүгд Найрамдах Турк улсын Ерөнхийлөгч Режеп Тайип Эрдоаны урилгаар тус улсад төрийн айлчлал хийхээр Анкара хотноо хүрэлцэн ирлээ. Айлчлалын үеэр талууд хамтран ажиллах тухай 10 гаруй баримт бичигт гарын үсэг зурахаар төлөвлөж байна.
-Монголд болж байгаа жүдо бөхийн хамтарсан бэлтгэлд ОХУ-н Красноярск, Тюмень хотуудын жүдо баг, Тажиикстан, Казакстан улсын багууд хамрагдаж, Япон улсын дасгалжуулагч Тацүаки Эгүса удирдаж байна.
1-р сарын 17 Баасан гараг
- Монгол Улсын Засгийн газар Бүгд Найрамдах Франц Улсын “Орано Майнинг” энгийн хувьцаат компанитай хөрөнгө оруулалтын гэрээнд гарын үсэг зурах ёслолын ажиллагаа боллоо.
-Сүмо бөхийн ёкозүна Тэрүнофүжи зодог тайлж байгаагаа зарлалаа. Тэрээр Исэгахама дэвжээнд туслах ояката болно.
-Өмнөд Солонгос улсад оршин сууж байгаа иргэдийн талаар Сөүл хот дахь Монгол Улсын ЭСЯ-наас мэдээллээ. Тус улсад Монгол Улсын нийт 55834 иргэн оршин сууж байна. Үүнээс бүртгэлгүй болон визийн зөрчилтэй 17075 иргэн байгаа аж. БНСУ-д 2024 онд нийт 38 монгол иргэн нас барсан ба үүнээс үйлдвэрийн болон автын ослоор 8, амиа хорлосон 6, бусад иргэн өвчний улмаас нас барсан байна.
