Хайр бол бүхний эхлэл. Гэхдээ зөвхөн хайртай гэдэг шалтгаанаар гэрлэлтэд хүрэх нь заримдаа хангалтгүй байж мэднэ. Хамтдаа ирээдүйг бүтээнэ гэдэг нь зөвхөн сайхан мөчүүдийг бус, бэрхшээлтэй цаг үеийг ч хамт туулна гэсэн үг. Тиймээс гэрлэхээсээ өмнө нэгнээ илүү гүнзгий таних, үнэнийг нээлттэй ярих цаг заавал гаргах хэрэгтэй.
Таныг аз жаргалтай, эрүүл харилцаанд алхам алхмаар ойртуулах заавал асуух 20 асуултыг хүргэж байна.
1. Чи өөрийгөө яг хэн гэж боддог вэ? Тэр хүн болох хүртлээ ямар зам туулсан бэ?
2. Хайрын тухай чиний ойлголт юу вэ? Хайр гэж яг юуг хэлдэг вэ?
3. Чи амьдралдаа юунд хамгийн их талархаж явдаг вэ? Яагаад?
4. Чиний хамгийн ихээр сэтгэлээр унасан үе хэзээ байсан бэ? Тэр үед хэн чамайг татаж гаргасан бэ — эсвэл чи өөрөө юу хийсэн бэ?
5. Чамд хэн нэгний өмнө уучлал гуйх, эсвэл уучлах хэцүү байсан түүх бий юу?
6. Бидний харилцаанд хамгийн их айж буй зүйл чинь юу вэ?
7. Чи надад хайртай гэдгээ мэдрэхэд юу хамгийн чухал вэ — үг үү, үйлдэл үү, хамт байх хугацаа уу?
8. Чи гэр бүлийнхээ тухайд хамгийн их юунд талархдаг вэ, хамгийн их юунаас зайлсхийхийг хичээдэг вэ?
9. Хамгийн сүүлд хэн нэгэн чиний зүрхийг өвтгөсөн үг хэлсэн үү? Ямар үг байсан бэ?
10. Чи өөрийгөө амьдралын аль шатандаа яваа гэж бодож байна вэ? Юу дутаж байгаа вэ?
11. Маргаан, үл ойлголцлын үед чи хэн болж хувирдаг вэ — дуугүй алга болдог уу, дүрэлзэн уурладаг уу?
12. Чи юунд гомддог вэ? Чамайг юу хамгийн амархан шархлуулдаг вэ?
13. Санхүүгийн асуудлыг хэрхэн шийддэг вэ? Хосуудын орлого, зардлыг яаж хуваах ёстой гэж боддог вэ?
14. Карьерын хувьд ирээдүйд юу хүсэж байна? Хосын харилцаанд хэрхэн нөлөөлнө гэж бодож байна?
15. Өөрийн гэр бүлийнхэнтэй хэр ойр байдаг вэ? Тэд бидний амьдралд ямар оролцоотой байх вэ?
16. Аз жаргалтай гэр бүл гэж чиний хувьд юуг хэлдэг вэ?
17. Гэр бүлийн үүрэг, хариуцлагыг хэрхэн хуваах ёстой гэж боддог вэ?
18. Өмнөх харилцаануудаасаа ойлгож, сурч авч байсан хамгийн чухал зүйл чинь юу байсан бэ?
19. Ирээдүйн 5, магадгүй цаашлаад 10 жилээ юу гэж харж байгаа вэ?
20. Олон жилийн дараа эргэн харахад, “Бид зөв шийдвэр гаргасан байна” гэж бодохын тулд одоо юу хийх хэрэгтэй вэ?
