Багш нар цалингаа нэмэгдүүлэхийг шаардаж, аравдугаар сарын 16-наас эхлэн ажил хаялт зарласан. Ийнхүү 20 гаруй хоногийн дараа талууд зөвшилцөлд хүрсэн байна. МБШУҮЭ болон Боловсролын яамны хооронд байгуулсан хэлэлцээрийг Гэр бүл, Хөдөлмөр, Нийгмийн Хамгааллын яаманд бүртгүүлэн албажуулснаар багш нарын ажил хаялт зогсох боломж бүрдлээ.
Боловсролын сайд П.Наранбаяр багш нарын ажил хаялттай холбоотой гурван талт хэлэлцээр тохиролцоонд хүрсэн талаар мэдээлэл хийлээ.
Тэрбээр "Өнгөрсөн баасан гарагт гурван талт хэлэлцээрээр тохиролцсон. МҮЭХ-оос ажил хаялтаа зогсоож байгаагаа Гэр бүл, Хөдөлмөр, Нийгмийн Хамгааллын яамны хөдөлмөрийн асуудал хариуцсан төрийн захиргааны төв байгууллагад гарын үсэг зурсан нэмэлт хэлэлцээрээ бүртгүүлэх шаардлага тавьсан. Багш нарын хэлэлцээрийг амилуулахад Ерөнхий сайд, Засгийн газрын гишүүд ГБХНХ-ын сайд нар чухал үүрэг гүйцэтгэсэн. 2026 оны төсөвт үндсэн цалинг 2 сая 226 мянган төгрөгт хүргэх, оны эцсээр 2.8 сая төгрөгт хүргэх, цалингийн бүтцийн шинэчлэл хийх үүрэг хүлээсэн. Ингэснээр ажил хаялт ойрын хугацаанд зогсож, хэвийн үйл ажиллагаагаа явуулах байх гэж харж байна. Маргаашаас ажил хаялтаа зогсоох байх гэж найдаж байна. Ажил хаялтыг зогсоох шийдвэрийг Үйлдвэрчний эвлэлийн холбооноос зарлах ёстой" гэлээ.
