СЕХ-ы 16:30 цагийн албан ёсны мэдээллээр дараах зураглал харагдаж байна. Нийслэлийн сонгогчид 37%-тай санал өгсөн буй бол Говь -Алтай, Сүхбаатар, Хэнтий зэрэг аймгуудад сонгуулийн ирц 40%-ийг давжээ. Одоогоор Сэлэнгэ аймаг 26.6%-ийн ирцтэй сүүл мушгиж байна.
Нийслэлийн хэмжээнд насны нарийвчилсан ангиллаар авч үзэхэд 20-29 насныхан хамгийн бага санал өгсөн харагдаж байна. Энэ насны 200 мянга гаруй сонгогчдоос 50 мянга орчим нь л санал өгөөд байна. Харин 65-аас дээш насны иргэд 68 мянга орчим бүртгэгдсэнээс 45 мянга нь санал өгчээ.
Улаанбаатар хотын сонгогчдыг дүүргээр нь нарийвчлан авч үзвэл Сүхбаатар, Баянгол, Багахангай дүүрэг идэвх өндөртэй байна. Харин Налайх, Чингэлтэй дүүрэгт сонгогчдын идэвх харьцангуй сул буйг харж болно.
Улсын хэмжээнд насны 12 ангиллаар тооцож, мэдээлэл хүргэж буй. Доор графикаас үзэхэд 20-35 насныхны ирц 30%-д ч хүрээгүй байна. Өдрийн хагас хэлбийж байхад буюу санал хураалт дуусахад хэдхэн цаг дутуу байгаа үед энэ нь тун хангалтгүй үзүүлэлт юм.
