Япон улс дэлхийн хамгийн хурдтай хөгширч буй орнуудын нэг болоод байна. Өнөөдөр тус улсын хүн амын бараг 30 хувь нь 65-аас дээш настай бөгөөд ганцаараа амьдардаг ахмад настнуудын тоо жил ирэх тусам нэмэгдэж байгаа нь нийгмийн томоохон сорилт болоод буй. Гэр бүл батлуулах тоо цөөрч байгаа энэ үед хүмүүсийн ганцаардал Японы хамгийн тулгамдсан асуудлуудын нэг болжээ.
Ийм нөхцөлд энгийн нэгэн хүргэлтийн үйлчилгээ санаанд оромгүйгээр нийгмийн чухал дэмжлэгийн сүлжээ болж хувирсан нь “Yakult Lady” буюу пробиотик ундаа хүргэдэг эмэгтэйчүүдийн тогтолцоо юм.
Өглөөний 08:30 цаг. Токиогийн нам гүм хорооллоор хөх өнгийн дүрэмт хувцастай эмэгтэй дугуй унан явна. Тэр бол өдөр бүр айлуудаар Yakult хэмээх жижиг савлагаатай пробиотик ундаа хүргэдэг “Yakult Lady”.
Түүний ажил ердөө ундаа хүргэх мэт боловч бодит байдал дээр энэ нь үүнээс хавьгүй их утга учиртай. Зарим өндөр настнуудын хувьд тэр эмэгтэй долоо хоногийн турш уулздаг цорын ганц хүн нь байж мэднэ.
Маэбаши хотод ганцаараа амьдардаг 83 настай эмэгтэй 25 жилийн турш долоо хоног бүр ижил хүргэлтийн бүсгүйг ирэхийг хүлээдэг байна. Хүүхдүүд нь аль хэдийн гэрээсээ явсан тул энэ уулзалт түүний амьдралын салшгүй хэсэг болжээ.
Тэрээр: “Долоо хоног бүр миний царайг харахаар заавал ирдэг хүн байгаа гэдгийг мэдэх нь маш их тайвшрал өгдөг. Бие муутай байсан ч хаалганы цаанаас ‘Өнөөдөр ямар байна?’ гэж асуухыг сонсоод хүч ордог” хэмээн ярьжээ.
Тэд зөвхөн бүтээгдэхүүн өгч аваад өнгөрдөггүй. Гэр бүл, цэцэрлэг, орон нутгийн мэдээ, эрүүл мэндийн талаар ярилцана. Жижиг мэт санагдах эдгээр яриа ахмадуудад “би ганцаараа биш” гэх мэдрэмж төрүүлдэг аж.
Yakult брэнд 1935 онд Японд үүсгэн байгуулагдсан. Тухайн үед “уудаг бактери” гэх ойлголт хүмүүст эргэлзээ төрүүлдэг байсан учир бүтээгдэхүүнээ тайлбарлахын тулд айл өрхөөр орж танилцуулдаг байжээ.
Анх эрэгтэй борлуулагчид ажилладаг байсан ч ажиллах хүчний хомсдолоос болж орон нутгийн эмэгтэйчүүдийг ажилд авч эхэлснээр борлуулалт огцом өссөн байна. Эмэгтэй хэрэглэгчид тэдэнд илүү итгэж, өрхийн хүнсний шийдвэр гаргалтад ч нөлөөлж байсан нь амжилтын үндэс болжээ. Ингээд 1963 онд албан ёсоор “Эмэгтэй хүргэлтийн сүлжээ”, өнөөгийн “Yakult Lady” систем бий болсон байна.
Өнөөдөр Япон даяар 31 мянга гаруй эмэгтэй хүргэлтийн ажилтнууд ажиллаж байгаа бөгөөд энэ загвар Хятад, Индонез, Малайз, Бразил, Мексик зэрэг улсуудад ч нэвтэрчээ. Зарим оронд тэднийг “Yakult mom” эсвэл “Yakult auntie” гэж өхөөрдөн дууддаг аж.
Японд ахмад настнуудын ганцаардал ноцтой түвшинд хүрчээ. 2050 он гэхэд 65-аас дээш насны ганцаараа амьдардаг хүмүүсийн тоо 11 саяд хүрэх төлөвтэй байна.
Тус улсад бүр кодокүши буюу “ганцаардлын үхэл” гэх нэр томъёо бий. Энэ нь хүн гэртээ ганцаараа нас бараад хэдэн сар, заримдаа хэдэн жил өнгөрөх хүртэл хэн ч мэдээгүй байх эмгэнэлт үзэгдлийг хэлдэг.
2025 оны эхний зургаан сарын байдлаар Японд 40,913 хүн гэртээ ганцаараа нас барсан нь өмнөх оны мөн үеэс өссөн үзүүлэлт аж. Үүнтэй холбоотойгоор Япон улс 2021 онд дэлхийн анхны “Ганцаардлын сайд”-ыг хүртэл томилж байсан.
Ийм нөхцөлд Yakult Lady нарын хаалга тогшиж, хэдхэн минут ярилцах энгийн үйлдэл олон хүний хувьд сэтгэлзүйн дэмжлэг болж байна.
Энэхүү компанид 25 жил ажилласан Сатоко Фүрүхатагийн хэлснээр, “Жинхэнэ инээмсэглэл, эерэг энерги хамгийн чухал. Сонсож чаддаг, жижиг өөрчлөлтийг анзаардаг байх хэрэгтэй” гэжээ.
Эцэст нь, технологи хөгжсөн өнөө үед ганцаардлыг зөвхөн бодлогоор биш, хүний халуун дулаан харилцаагаар бууруулж болдгийг Японы йогурт хүргэлтийн ажилтнууд харуулж байна. Заримдаа нэг хаалга тогших, “Та сайн уу?” гэж асуух нь хүний амьдралд хамгийн хэрэгтэй зүйл байж болох юм.
