1 мин

Ухаалаг хүүхдүүд илүү "марзан" байдгийг судалгаагаар тогтоожээ

Г.Сүрэн 2021.10.11

Олон улсын "Humor" судалгааны сэтгүүлд ухаалаг хүүхдүүд хошин шогийн мэдрэмжтэй, хөгжилтэй, нэг үгээр "марзан" байдаг тухай шинэ судалгаа нийтлэгджээ. Өөр өөр оюуны чадамжтай (IQ) хүүхдүүдэд 10 өөр төрлийн комик ном үзүүлэхэд оюуны өндөр чадамжтай хүүхдүүд илүү их инээж, комик зураглалыг ойлгож, хөгжилдөж, бусадтай ярилцан "маазарч" байжээ.

Шинжлэх ухаанч, комик зураачдын хамтран явуулсан уг судалгаанд оролцсон хүүхдүүд 10 комик номыг үзэн, инээдтэй эсэхийг нь 1-10 оноогоор үнэлэх даалгавар биелүүлжээ. Оюуны өндөр чадамжтай хүүхдүүд 92 хүртэлх оноог өгсөн бол дунджаас доогуур оюуны чадамжтай хүүхдүүд 54 хүртэлх оноог өгчээ. Олон улсын үнэлгээгээр хүүхдийн оюуны чадамж (IQ) 85-115 байвал "өндөр чадамжтай" буюу гоц ухаантай хэмээн үздэг аж.

Уг судалгааны зарим үр дүн:

- Оюуны өндөр чадамжтай байх тусам хүүхдэд илүү хөгжилтэй байдаг.

- Оюуны өндөр чадамжтай хүүхдүүд ямар ч бүлэг дотор өөрийнхөөрөө байж чаддаг.

- Хүүхэд онигоо хэлж, утга учиргүй зүйлд инээх нь асуудал биш бөгөөд хошин зан авир нь ухаалаг болохыг нь илтгэх тул буруутгаж болохгүй.

Эх сурвалж: Degruyter.com