Хэвлэл мэдээллийн агуулга дахь жендэрийн тэгш байдлыг дэмжихээр редакторууд зөвлөлдлөө
Хэвлэл мэдээллийн байгууллагын ерөнхий редакторууд зөвлөлдөх уулзалт хийж, сэтгүүл зүйн агуулга дахь жендэрийн мэдрэмжтэй байдлын талаар хэлэлцэн, санал бодол солилцлоо.
Хэвлэл мэдээллийн зөвлөл, “Анлимитед медиа” группын хамтарсан “Мэдрэмжтэй мэдээлье” нэгдлээс зохион байгуулсан тус зөвлөлдөх уулзалтанд gogo.mn, ikon.mn, itoim.mn, ub.life сайтууд болон MNB, Өдрийн сонин, Зууны мэдээ зэрэг хориод томоохон мэдээллийн байгууллагын редакторууд оролцов.
Судалгаагаар монголд сэтгүүл зүйн үйл ажиллагаан дахь дөрвөн эх сурвалж тутмын нэг нь, улс төрийн мэдээний эх сурвалжийн арван хүн тутмын нэг нь эмэгтэй хүн байна. Тодруулбал өдөр тутмын сонин болон мэдээллийн сайтуудын улс төрийн мэдээллийн топ эх сурвалж болох 50 хүний 5 нь л эмэгтэй хүн байгаа юм. Энэ үзүүлэлтийг өсгөх, эмэгтэйчүүдийн дуу хоолой, үзэл санааг хэвлэлээр эн тэнцүү мэдээлэх санаачлагат редакторууд ийн нэгдэж, туршлага солилцсон юм.
Зураг | Тайлбар |
Туршлагаас үзэхэд нэр бүхий редакциуд эх сурвалжид эзлэх эмэгтэйчүүдийн тоог хянаж, тодорхой хувиас буулгахгүй байх бодлого баримтлан ажиллаж байна. Мөн энэхүү үйлийг албажуулах байдлаар эх сурвалжийн хүйсийн тэнцвэрт байдлыг хангах бүртгэл хөтлөн, өдөр тутмын нийтлэл, нэвтрүүлгийн хэчнээн хувь нь эрэгтэй болон эмэгтэй хүн болохыг бүртгэж, тэнцвэржүүлж ажиллах санаачлага уулзалтаас гарлаа.
Зөвлөлдөх уулзалтанд Хэвлэл мэдээллийн зөвлөлийн хараат бус зөвлөх Д.Мөнхчимэг, Стратеги академийн захирал Б.Болорсайхан нар илтгэл тавьж, жендэрийн мэдрэмжтэй сэтгүүл зүйн асуудал дэлхий дахинаа болон монголд ямар түвшинд буй судалгаа, мэдээллүүдийг танилцуулсан юм.
Шийдвэр гаргах түвшин дэх эмэгтэйчүүдийн эзлэх хувиар бид дэлхийн 187 орноос 130 дугаарт жагсаж буй нь Монгол Улс Ойрх Дорнод, Хойд Африктай эн зэрэгцэн яваа үзүүлэлт аж. Тиймээс хүн амын тал хувь нь болсон эмэгтэйчүүдийн дуу хоолойг орхигдуулахгүй байх, тэнцвэртэй мэдээлэх, хүйсийн хэвшмэл ойлголтоос ангид мэргэжлийн түвшинд ажиллахыг хэвлэл мэдээллийн салбарынханд уриалж, хамтран ажиллах санаачлагыг "Мэдрэмжтэй мэдээлье" нэгдэл болон уулзалтанд оролцсон редакторууд хамтран гаргалаа.
“Мэдрэмжтэй мэдээлье” нэгдлийг Хэвлэл мэдээллийн зөвлөл болон Анлимитэд медиа группийн хамтарсан консорциумаас БНСУ-ын Олон улсын хамтын ажиллагааны агентлаг (КОЙКА), НҮБ-ын Хөгжлийн Хөтөлбөрийн хамтран хэрэгжүүлж байгаа “Монгол Улсад шийдвэр гаргах түвшинд жендэрийн тэгш байдлыг нэмэгдүүлэх, эмэгтэйчүүдийн оролцоог дэмжих нь” төслийн хүрээнд үүсгэн байгуулав.