1 мин

Сахилгагүйтсэн хүүхдийг ШИЙТГЭХ бус БЯСАЛГАЛ хийлгүүлдэг болжээ

Г.Сүрэн 2022.01.12 1 1

4

АНУ-ын Мэрилэнд мужийн зарим бага сургуулиуд анги дээрээ сахилгагүйтэж, үймүүлсэн хүүхдүүдийг шийтгэх бус "Тайвшрах өрөө"-нд оруулан бясалгал хийлгүүлэх болжээ. Бага насны хүүхдүүд сэтгэл тавгүй, стресстэй, хямарсан, тогтворгүй үедээ сахилгагүйтдэг нь шинэ судалгаагаар тогтоогдсон тул хүүхдүүдэд зөөлөн хандаж, сэтгэл санаа тайвшруулах дасгал хөдөлгөөн, бясалгал хийлгүүлэх нь эерэг үр дүнтэй гэж үзжээ. 

Хажуудаа суудаг хүүхэдтэй муудалцсан сурагчийг "Тайвшруулах өрөө"-нд оруулсны дараа сэтгэгдлийг нь асуухад "Яагаад уур хүрээд байснаа ойлгосон. Жаахан амьсгалын дасгал хийсэн чинь уур хүрэхээ больчихсон. Тэгээд тайвшраад найзаасаа уучлал гуйсан" гэжээ. 

Сургуулийн сэтгэл зүйч "Тайвшруулах өрөө"-нд ажиллан, хүүхдүүдэд сэтгэл зүйн зөвлөгөө өгч, өөрийгөө ойлгох, сэтгэл зүйгээ удирдах арга барилын талаар зааж өгөх юм. Мэрилэндийн бага сургуулийн сэтгэл зүйч "Нэг сурагч маань өдөржин үймүүлж, ангийнхандаа уцаарлаж, нэг л хэвийн бус ааш авир гаргах болсон. Түүнийг ангийнхнаас нь холдуулж, тайвшруулаад асуухдаа л өвөө нь саяхан нас барсан болохыг нь мэдсэн. Хүүхэд бүрийн амьдрал, сэтгэл санаа ямар байгааг бид хараад л шууд хэлж чадахгүй учир шууд шийтгэх нь хэзээд ч зөв сонголт биш" гэжээ.

Эх сурвалж: CNN

Г.Сүрэн 2022.01.12

4