Бельгийн Антверпен хотноо сагсан бөмбөгийн 3х3 төрлийн ДАШТ өнөөдөр гурав дахь өдрөө үргэлжилж байна. Монголын эрэгтэй шигшээ баг “B” хэсэгт Литва, Герман, Тайвань, Чилийн багуудын хамт ороод буй. Тэд өнгөрсөн шөнө Тайвань болон Литвтэй эхний тоглолтуудаа хийв. Тайваньтай хийсэн эхний тоглолтын үеэр Монголын шигшээ багийн тоглогч ус уух үед ФИБА-ийн гэрэл зурагчин сонирхолтой агшныг хальснаа буулгажээ. Тодруулбал, усны саван дээр тактикийн хувилбарууд бичээстэй байв. Тоглолт бүрийн өмнө дасгалжуулагчид эсрэг багийн тоглолтод тааруулж Check-нээс хийх хувилбарууд, тоглолтон дундаас хийх хувилбарууд, хувилбарын дарааллууд, Check-нээс хэн довтлохыг төлөвлөж тоглолтонд оролцдог. Гэхдээ үүнийг цээжлэхийн тулд Check-нээс хийх хувилбаруудаа усны саван дээрээ бичсэнийг ФИБА-ийн гэрэл зурагчин ийн гярхай ажиглаж дурандаа буулгасан аж.
Эрэгтэй шигшээ баг уг тоглолтод Тайванийг 22:15 үр дүнгээр хожсон билээ. Харин хоёр дахь тоглолтдоо Литвтэй таарч 15:21 харьцаатайгаар хожигдов. Улмаар одоогийн байдлаар хэсгийнхээ гуравдугаар байрт бичигдэж байна. Тэд маргааш Герман болон Чилийн шигшээ багуудтай хэсгийнхээ сүүлийн тоглолтуудыг хийх юм.
