Өдөр бүр хайртай хүнээ 20 секунд тэврэх нь сэтгэл зүй болон зүрх судасны үйл ажиллагааг дэмжиж, стресс ядаргааг тайлан, аз жаргалын окситоцин дааврын ялгаруулалтыг нэмэгдүүлж, сэтгэл гутралаас сэргийлдэг болохыг судлаачид тогтоожээ. Хайртай хүнээ тэврэхэд бид тайвширч, амар амгаланг мэдэрч, үнэн сэтгэлээсээ амарч чаддаг байна. Окситоцин дааврыг судлаачид "тэврэлтийн даавар" гэх нь ч бий.
Хайртай хүнээ тэвэрснээр дархлаа сайжирч, архи согтууруулах ундаа болон бусад төрлийн мансууруулан тайтгаруулах бодист автах хүсэл багасаж, стресс ядаргаа тайлагдах болно. Ялангуяа ямар нэгэн айдас түгшүүрт зүйлийн өмнө буюу тариа хийлгэх, эмчид үзүүлэх, ажлаасаа гарах, хүнд хэцүү шалгалт өгөх зэргийн өмнө хайртай хүнээ тэврэх нь айн сандрах мэдрэмжийг үгүй хийнэ.
2014 онд АНУ-ын Карнеги Меллон Их сургуулиас 400 насан хүрэгчдэд туршилт явуулан нэг хэсэг оролцогчийг хоёр долоо хоногийн турш өдөр бүр дотны хүнээ тэврэхийг, нөгөө хэсэг оролцогчийг огт тэврэхгүй байхыг хүсжээ. Ингээд туршилт дуусахад хайртай хүнээ өдөр бүр тэвэрсэн оролцогчдын өөдрөг, аз жаргалтай байдал, дархлааны чадамж нэмэгдсэн, амьдралдаа сэтгэл хангалуун байгаа нь ажиглагдсан байна.
Эх сурвалж: Dignity Health
