1 мин

Атлетик Бильбаогийн дэмжигчид талбай руу хуурамч мөнгө шидэж, Барселонад зэвүүцлээ илэрхийлэв

У.Чинзориг 2023.03.14

Испаний Ла лигийн 25-р тойрогт хүснэгтийг тэргүүлж буй Барселона клуб Атлетик Бильбаогийн талбайд зочлон тоглосон юм. Энэ үеэр Атлетик Бильбаогийн дэмжигчид Сан Мамес цэнгэлдэх хүрээлэнгийн талбай руу хуурамч мөнгө шидэж, Барселонагийн холбогдоод буй авлигын дуулианд зэвүүцлээ илэрхийлжээ. Тус клуб Испанийн хөлбөмбөгийн шүүгчдийн хорооны тэргүүлэгч гишүүний эзэмшдэг компанид гурван жилийн хугацаанд 1.5 сая долларыг шилжүүлсэн хэргээр буруутгагдан, Барселона хотын Прокурорын газар шалгагдаж буй юм.

Барселона клубын дасгалжуулагч Шави тоглолтын дараагаар "Би Сан Мамес дахь дэмжигчдийг хүндэлдэг, тэд надад үргэлж сайн ханддаг. Сан-Мамесаас Барселона руу чиглэсэн өнөөдрийн дайсагнасан үйлдэл намайг үнэхээр гайхшруулж, бас харамсаж байна. Урьдчилан дүгнэх нь нийгэмд сайн зүйл биш" хэмээн ярьжээ.

Тоглолтын цор ганц гоолыг Рафинья оруулснаар Барселона 1:0-ээр хожиж, есөн онооны зөрүүгээр Ла лигийг тэргүүлж байна.