1989 онд бусдын амь насанд заналхийлэн бүлэглэн дээрэмдсэн хэргээр буруутгагдан 23 насандаа 400 жилийн хорих ял авсан АНУ-ын Сидней Холмес гэх эр 34 жилийн дараа гэм буруугүй нь тогтоогдож, суллагджээ.
Өнөөг хүртэл нэр нь тогтоогдоогүй хоёр эр дэлгүүрт орон эздэд нь буу тулган сүрдүүлэн дээрэмдэж, хохирогчийн автомашиныг хулгайлан зугтаасан бөгөөд Сидней Холмесийг тэдний хамтрагч, хэрэг гарсан өдөр жолоо барин хэрэгтнүүдийг зугтаалгасан, нэрийг нь нууцалсан хэмээн буруутгажээ.
Улмаар хэрэг мартагдах дөхсөн ч 2020 онд явуулсан мөрдлөгөөр хэрэг гарсан өдөр Холмесийн машиныг буруу таньсан, хэрэгтнүүдийн машин асаасан түлхүүр Холмесийнхоос өөр байгаа талаар сэжүүр гарч, хэргийг ахин сэргээжээ.
Ийнхүү 400 жилийн хорих ялаас 34 жилийг нь барагдуулаад байсан Холмес 56 насандаа цагаатгагдан гэр бүлийнхэнтэйгээ эсэн мэнд уулзжээ. "Гэм буруугүй минь илрэх хүртэл тэвчээртэй хүлээхээс өөр сонголт надад байгаагүй. Би үзэн ядаж чадаагүй. Зүгээр л урагшлахаас л өөр арга байгаагүй. Эрт хойно хэзээ ч үнэн ялдаг юм байна" гэж Холмес хэлжээ.
Эх сурвалж: CNN
