Австрийн Вена хотноо сагсан бөмбөгийн 3х3 төрлийн ДАШТ дөрөв дэх өдрөө үргэлжилж байна. Монголын эрэгтэй шигшээ өнөөдөр Швейцарьтай тоглолоо. Монголчууд тоглолтыг 5:1 харьцаатайгаар онооны давамгай эхлүүлсэн ч, цагийн төгсгөлд оноогоор гүйцэгдэж 22:17-оор хожигдов. Алдаа олширсон нь тоглолтын үр дүнд голлон нөлөөллөө. Тус тоглолтод Д.Дэлгэрням долоо, О.Энхбаатар, А.Ананд нар тус бүр дөрөв, Ц.Отгонжаргал хоёр оноог авсан юм.
Монголын шигшээ хэсгийн шатнаа Унгарын багийг хожиж, ДАШТ-ий хошой мөнгөн медальт Нидерландад хожигдоод буй. Тэд өнөөдөр 21:25 цагаас Японы багтай хэсгээс шалгарахын төлөөх чухал тоглолтыг хийнэ. Хэрэв Японыг хожвол хасагдах шатнаа Бразилтай таарч тоглох юм.
