УДБЭТ-ын хамт олон түүхт 60 жилийн ойн арга хэмжээгээ “Сонгодог Жаран” гала концертоор эхлүүлэх гэж байна. УДБЭТ нь 1963 оны тавдугаар сарын 15-ны өдөр П.И.Чайковскийн "Евгений Онегин" дууриар хөшгөө нээснээс хойш эдүгээ жаран жилтэйгээ золгож буй. Анх Улсын Хөгжимт Драмын Театраас 1963 онд Дуурь Бүжгийн Улсын Театр болон өрх тусгаарласнаар одоогийн Улсын Дуурь Бүжгийн Эрдмийн Театр байгуулагдсан түүхтэй.
Улсын Дуурь Бүжгийн Эрдмийн Театр нь 1963 оноос хойш 60 жилийн турш өнөөдрийг хүртэл дэлхийн томоохон театруудын тайзнаа тоглогддог олон арван сонгодог бүтээл болон үндэсний бүтээлүүдээ үзэгчдийн хүртээл болгож урын сангаа баяжуулсаар ирсэн. УДБЭТ-ын хамт олон ойн хүрээндээ нэгэн жарны түүхийг өгүүлсэн олон арга хэмжээг зохион байгуулахаар төлөвлөн ажиллаж, ойн арга хэмжээгээ ”Сонгодог Жаран” гала концертоор ийн эхлүүлэх гэж байна.
Тоглолт 2023 оны есдүгээр сарын 09-ны 20.00 цагт Төв талбайд болох юм. Эрхэм үзэгчид та бүхнийг 60 жилийн түүхтэй УДБЭТ-ын хамт олонтой нэгэн оройг хамт өнгөрүүлэхийг урьж байна. Ийнхүү 60 жилийн түүхтэй сонгодог театрын ойн арга хэмжээ эхэлж байгаа бөгөөд аравдугаар сарын 15-ныг хүртэл та бүхэнтэйгээ олон гайхамшигт арга хэмжээгээр уулзах болно.
Сонгодог урлагийг дэмжин хамтран ажилладаг, үнэнч хамтрагч, хэрэглэгчиддээ УДБЭТ-ын хамт олны нэрийн өмнөөс 60 жилийн ойн баярын мэнд хүргэе.
