1 мин

Эрлинг Хааланд Норвегийн шигшээд 26 дахь тоглолтодоо 25 дахь гоолоо орууллаа

У.Чинзориг 2023.09.13

Өнгөрсөн шөнө "Евро 2024" тэмцээний урьдчилсан шатны хүрээнд Норвеги, Гүржийн багтай тоглолоо. Эрлинг Хааланд, Мартин Одегаард нар гоолдож, Норвегийн шигшээ өрсөлдөгчөө 2:1-ээр хожсон юм.

Эрлинг Хааланд шигшээ багийнхаа төлөөх 26 дахь тоглолтодоо оролцож, 25 дахь гоолоо оруулав. Гүржийн багийг хожсон Норвегичүүд "Евро 2024" тэмцээнд оролцох найдвараа хадгалсан хэвээр үлдлээ. Тэд одоогоор "А" хэсгийн гуравдугаар байрт бичигдэж байна. Тэдний өмнө Испани нэг тоглолт дутуу, хоёр онооны илүү, Шотланд найман онооны зөрүүтэй тасарч яваа юм. Хэсгийнхээ эхний хоёр байраар шалгарсан багууд Европын АШТ-д оролцох эрхээ авах учиртай.

"Евро 2024" тэмцээний урьдчилсан шатны хүрээнд өнгөрсөн шөнө явагдсан бусад тоглолтуудын үр дүнг танилцуулбал, Испани, Киприйг 6:0-ээр, Бельги, Эстонийг 5:0-ээр бут ниргэсэн бол Итали, Украиныг 2:1-ээр, Хойд Македон, Мальтыг 2:0-ээр, Румын, Косовог 2:0-ээр, Швейцарь, Андорраг 3:0-ээр, Израиль, Беларусыг 1:0-ээр, Австри, Шведийг 3:1-ээр хожсон юм.