Дэлхийн хамгийн хатуу хоолыг чулуугаар хийдгийг та мэдэх үү? Хятадын уламжлалт аргаар чулууг олон төрлийн амтлагчаар шарж хууран боловсруулан хийдэг хоол трэнд болж, дэлхий нийтийг гайхшируулж байна. Хятадын Хубэй мужаас гаралтай энэхүү хоолыг идэхийн тулд чулууны гадрыг сорон хүлхэж, мөлгөр чулууг нь хаях зориулалттай гэнэ. Хоолыг "хүлхээд хаях" буюу "suodiu" гэж нэрлэдэг гэнэ.
Хятадын гудамжны хоолны соёлын нэг хэсэг болсон энэхүү хоолыг мах шарж буй мэт тос сармис, олон төрлийн цуу, чинжүүтэй холин хуурснаар өвөрмөц амттай болдог байна. Тогооч нар үйлчлүүлэгчийн хүсэлтээр өөр өөр амтаар хуурч өгөх бөгөөд нэг таваг нь 16 юань үнэтэй.
Эрт дээр үед хятад завьчид бараа тээврээ ачиж явахдаа эрэг дунд гацаж, хоол хүнсгүйгээс энэхүү чулуун хоолыг бодож олсон гэх яриа байдаг гэнэ.
Эх сурвалж: CNN
