Дэлхийн алдарт "Washington Post" болон "New York Times" агентлагууд жил бүр тухайн онд цацагдан, дуу хөгжмийн салбарт өндөр үнэлгээ авч буй цомгуудын жагсаалтыг гаргадаг билээ. Тэгвэл "Washington Post" 2023 оны шилдэг хөгжмийн цомгуудын нэгээр, "New York Times" 2023 оны шилдэг жазз цомгийн нэгээр монголын уран бүтээлч Энжигийн "Улаан" цомгийг онцоллоо.
"Долдугаар сард цацагдахад нь энэ цомгийг сонсож амжаагүй бол өөртөө бүү хатуурх. Харин Монголд төрсөн Мюнхенд амьдардаг залуухан монгол дуучны шивнэлтээс илүү далайцтай хоолойгоо гаргасан гурав дахь цомгийг бүү алдаарай. Энжи өөрийн эх орны уртын дууны уламжлалт цуурайг жазз хөгжмийн тембртэй хослуулжээ. "Кафе" маягийн жазз дуучид ийм мадаггүй зөв, төрөлхийн, чөлөөтэй сонсогдох нь тун ховор" гэж "New York Times" бичжээ.
Харин "Washington Post" жагсаалтдаа "Ер бусын түүх, ер бусын хөгжим. Монгол гэрт төрж өссөн Э.Энхжаргал Германы жазз хөгжмийн хөтөлбөрт хамрагдах хүртлээ хөгжмийн багшаар ажиллаж байжээ. Ийн тэр Энжи нэрээр дуучны карьераа эхлүүлж, эхлээд бөмбөрчин Билли Харттай, дараад нь өөрийн дуунууд бүхий, харин одоо "Улаан" цомгийг гаргаад байна" гэжээ.
