ОУОХ-ноос Парисын олимпод оролцож болох ОХУ-ын чөлөөт бөхийн тамирчдын нэрсийг зарласан. Үүнд, Садулаев тэргүүтэй олимпын аваргууд багтаагүй билээ. ОХУ-ын Спорт бөхийн холбооноос хэдийгээр орос бөхчүүд олимпод оролцоно гэж зарлаж байсан ч дарамтыг дийлээгүй бололтой.
Өнөөдөр ОХУ-ын Спорт бөхийн холбооноос чөлөөт бөхийн тамирчид Парисын олимпод оролцохоос татгалзаж байгаагаа мэдэгдлээ.
Мэдэгдэлд “Оросын бөхчүүд 18 боломжит олимпын эрхээс 16 эрх авсан. Өнгөрсөн сарын дундуур ОУОХ-ноос олимпод оролцож болох арван тамирчны нэрийг зарласан дотор зургаа нь Орос дотроо ч лидер биш бөхчүүд байлаа. ОУОХ-ноос Абдулрашид Садулаевыг олимпын 3 удаагийн аварга болоход нь саад хийж, Заурбек Сидаков, Заур Угуев, Муса Евлоев нарын шилдгүүдэд олимпод барилдах боломжийг нь хаалаа. Үүнтэй холбогдуулан манай холбоо тамирчин, багш дасгалжуулагч нарын өргөтгөсөн хурал хийж, Олимпын наадамд оролцохоос татгалзах шийдвэр гаргалаа. Олимпод орох эрх авсан арван тамирчин ч олимпоос татгалзаж байгаагаа илэрхийлсэн. Бидэнгүй олимпын наадам дутуу, дулимаг наадам байх болно” гэж дурджээ.
