Канадын саятан гэр бүл Аляскийн уугуулуудад зориулсан Ковидын вакцинаас хулгайгаар тариулаад баривчлагджээ
Аляскийн Юкон нутгийн уугуул оршин суугчид болох 100 гаруй хүнийг цар тахлаас хамгаалахын тулд яаралтай дархлаажуулалтанд хамруулах ажлыг Канадын Засгийн газар, Юконы засаг захиргаа хамтран хийжээ. Уугуул Юкончууд буюу Хойд Америкийн индианууд болох тэдгээр хүмүүс алслагдсан бүс нутагт амьдрах ба хүн амын дийлэнх нь өндөр настнууд тул ийнхүү яаралтай хамгаалалтанд авч, вакцинжуулах шийдвэр гаргажээ.
Гэтэл эдгээр уугуулчуудад вакцин тарих явцад Канадын тэргүүн баячуудын нэг эхнэрийн хамт Юкон руу хувийн онгоцоор нисч очин, өөрсдийгөө тэндхийн дэн буудлын ажилчид хэмээн танилцуулж, вакцинжуулалтанд хамрагдсаныг албаны хүмүүс тогтоон, тэднийг баривчилсан байна.
Родни болон түүний эхнэр Екатерина Бэйкэр нар явуулын эмнэлэг байрлаж буй дэн буудлын ажилчид гэж өөрсдийгөө танилцуулан вакцин хийлгэсний дараа тухайн буудлын ажилтнаас нисэх буудал руу такси захиалж өгөхийг хүсчээ. Энэ үед тэднийг өөрсдийн ажилчид биш гэдгийг буудлын зүгээс баталгаажуулснаар явуулын эмнэлгийнхэн цагдаа дуудсан байна. Цагдаа нар тэднийг онгоцны буудлаас Ванкувер руу буцаж нисэх гэж байхад нь баривчилжээ.
Тэднийг нийгмийн эрүүл мэндийн дэг журмыг зөрчиж, Юкон дахь уугуул иргэд болон тусгаарлалтын багийнхныг эрсдэлд оруулж, дүрэм журмыг үл хайхран худал мэдээлэл өгч, онцгой нөхцөлд авч хэрэгжүүлэх яаралтай арга хэмжээнд саад учруулсан хэмээн үзэж мөнгөн торгууль болон 6 сар хорих шийтгэл оноожээ. Родни Бэйкэр Канадын мөрийтэй тоглоомын корпорацийн тэргүүн байсан ба энэхүү увайгүй үйлдлээсээ болж өнгөрсөн долоо хоногт албан тушаалаа хүлээлгэн өгсөн юм.
Дашрамд хэлэхэд Канадын Алясктай хиллэдэг Юкон орчмын алслагдсан бүс нутгаар цөөн тооны уугуул иргэд оршин суудаг ба тэдний аюулгүй байдал, эрүүл мэндэд хохирол учруулахгүйн тулд тодорхой хэмжээгээр хатуу дүрэм журам баримталж, бусад бүс нутгаас тийш зорчиж буй хүмүүсийг хязгаарлаж, зарим тохиолдолд албадан буцаадаг байна. Ялангуяа Ковид гарснаас хойш Юкон орчмын нутгаар Канадын иргэдийг аялуулахгүй байгаа ажээ.