ИНТРОВЕРТ хүмүүст цахим сургалт хамгийн үр дүнтэй гэжээ
Алсын зайны сургалт хөгжих нь интроверт буюу "дотогшоо" зан төлөвтэй хүмүүст хамгийн олзуурхууштай гэж судлаачид үзжээ. Учир нь интроверт суралцагч цахимаар сурахдаа танхимын хичээлээс илүү үр дүнтэй, сэтгэл зүйн хувьд ч таатай байдаг гэдгийг 2020 оны хөл хорионы үеэр АНУ-ын сурагчдаас явуулсан судалгаагаар тогтоосон байна.
Танхимаар хичээллэх үед интровертүүд багшаас асуулт асуух, багаар ажиллах гэх мэт олон нийтийн харилцаанд зайлшгүй хамрагдах шаардлага тулгардаг бол цахимаар хичээллэхэд энэ бүхэн хялбар санагддаг төдийгүй илүү нээлттэйгээр өөрийгөө илэрхийлж, идэвх санаачилга гаргаж чаддаг гэжээ.
Аливаад ул суурьтай хандахыг эрмэлздэг интровертүүд "zoom"-ээр хамт олонтойгоо холбогдож, цахим сүлжээгээр сэтгэл хөдлөлөө илэрхийлэхдээ биечлэн уулзахаас илүү чөлөөтэй, нээлттэй байж чаддаг бол гадагшаа буюу экстроверт хүмүүс бачимдаж, ганцаардаж, сэтгэл санаагаар хямардаг тул өөрийн зан төлөвөөс хамааран танхимын болон цахим сургалтаас сонгохыг зөвлөжээ.
Мөн танхимын хичээлийн үед эктроверт суралцагчид багштай илүү их харилцаж, интровертүүд орхигдох хандлагатай байдаг бол цахим сургалт ижил тэгш боломж олгодгийг багш нар ч анхаарах хэрэгтэйг онцолсон байна.