Архи нь дууссанаас болж ОХУ-д 7 хүн гар ариутгагч ууж нас баржээ
ОХУ-ын Томтор гэх жижигхэн тосгонд 7 иргэн гар ариутгагч уусны улмаас нас баржээ. Мөн өөр хоёр хүн комад орж, сэргээн амьдруулах тасаг руу шилжсэн байна.
Нийт 9 хүн цомхон үдэшлэг зохиож, согтууруулах ундаа хэрэглэж байсан бөгөөд уух юм нь дууссаны улмаас тэд том савтай гар ариутгагчийг ууж эхэлжээ.
41 настай эмэгтэй, 27 болон 59 настай эрэгтэй гурав хамгийн түрүүнд бие нь муудаж, удалгүй амиа алджээ.
Үлдсэн зургаан иргэнийг нисэх онгоцоор зөөж эмнэлэгт хүргэсэн ч 28, 32 болон 69 настай гурван хүн өнгөрөгч баасан гарагт, өөр нэгэн иргэн бямба гарагт гүн хордлогын улмаас нас баржээ.
Роспотребнадзор буюу ОХУ-ын Хэрэглэгчдийн эрх ашгийг хамгаалах газраас тус хэргийн тухай мэдээлж, иргэдийг анхаарал болгоомжтой байхыг сануулжээ.