Грета Тунберг Коронавирусийн халдвар авсан байж болзошгүй гэдгээ зарлалаа
"Бидний үйлдэл бол бусад хүмүүсийн хувьд амьдрал ба үхлийн ялгаа байж болно."
Уур амьсгалын өөрчлөлтийн эсрэг тэмцэгч 17 настай Грета Тунберг COVID-19 туссан байх магадлалтай гэдгээ зарлаж, залуучуудыг гэртээ үлдэхийг уриалав.
Мягмар гарагт Инстаграм дахь пост дээр Тунберг сүүлийн хоёр долоо хоногийн турш өөрийгөө тусгаарласны дараа бие нь сайжирсан гэжээ. Тэрээр хэлэхдээ, 10 орчим хоногийн өмнө ядаргаа, хоолой загатнах, өвдөх, ханиалгах зэрэг COVID-19 шинж тэмдгийг мэдэрч, түүнтэй хамт Брюссель хотоор аялж явсан аав нь халуурах шинж тэмдгийг илүү хүчтэй мэдэрсэн гэжээ.
Тэрээр хэлэхдээ би COVID-19 шинжилгээ өгөөгүй ч өвчний шинж тэмдэгүүд болон үүссэн нөхцөл байдлыг харгалзан яаралтай эмнэлэгийн тусламж авах шаардлагагүй гэжээ.
Өсвөр насныхан, залуу хүмүүс санаандгүйгээр өвчний эрсдэлийг нэмэгдүүлэх, бусдад өвчин тарааж болзошгүй учраас шинж тэмдэгүүд хөнгөн илэрвэл эсвэл шинж тэмдэг огт байхгүй байсан ч гэртээ үлдэхийг уриалжээ.
Төгсгөлд нь тэрээр “Би зовиур бараг мэдрээгүй, миний сүүлд туссан ханиад үүнээс хамаагүй муу байсан” гэжээ.
Хэрэв аавд маань надтай ижил шинж тэмдэгүүд илрээгүй байсан бол би анзаарахгүй байх байсан гэв.
“Ихэнх хүмүүс (ялангуяа залуучууд) шинж тэмдгийг анзааралгүйгээр эрсдэлт бүлгийн хүмүүст дамжуулж болзошгүй. Залуучууд эрсдэлт бүлэгт багтахгүй бөгөөд бидний үйлдэл бусад хүмүүсийн үхэл, амьдралын зааг болж чадна.
Тунберг өмнө нь өөрийн дагагчдыг коронавирусийн тархалтыг зогсоох зорилготойгоор “Дижитал уур амьсгалын ажил хаялт”-д оролцохыг уриалж байсан байна.
Тунберг өөрийн твиттер хуудаснаа "Бид хямралыг хямрал гэж үзэхгүйгээр шийдэж чадахгүй бөгөөд бид мэргэжилтнүүд, шинжлэх ухаан дор эвлэлдэн нэгдэх ёстой. Залуучууд бид энэ вируст өртөх эрсдэл бага, гэхдээ бид эмзэг бүлгийн хүмүүстэй эв нэгдэлтэй байж, нийтлэг нийгмийнхээ ашиг сонирхолд нийцүүлэн ажиллах нь тун чухал юм" хэмээн жиргэжээ.
Мэдээ бэлтгэсэн: Ц.Цэвээнравдан
Эх сурвалж: Buzzfeed News