СУДАЛГАА: 15-25 настай охид, бүсгүйчүүдийн олонх нь онлайн халдлагад өртдөг
Plan International байгууллага 22 орны 14 мянган эмэгтэйчүүдийн дунд хийсэн судалгааны үр дүнгээ саяхан танилцуулжээ.
Тэд 15-25 насны 14 мянган охид, бүсгүйчүүдтэй ярилцлага хийсэн бөгөөд сошиал медиа ашигладаг эмэгтэйчүүдийн олонх нь онлайн орчинд халдлагад өртөж байсан гэж хариулжээ. Тухайлбал, гадаад үзэмж болон биеийн хэлбэр, хэмжээг нь шүүмжлэх, онлайн орчинд мөрдөж мөшгөх, биеийн нууц хэсэг, эрхтнийхээ зургаа мессежээр илгээх гэх мэт онлайн халдлага түгээмэл байдаг аж.
Түүнчлэн нийгмийн платформуудад онлайн халдлагын эсрэг зохицуулалт сул байдгаас охид, эмэгтэйчүүд асуудлыг бие даан шийдвэрлэхээс өөр аргагүйд хүрч байгааг Plan International байгууллага онцолжээ.
"Эдгээр нь бие махбодын халдлага биш байж болох ч ихэнх тохиолдолд тасралтгүй үргэлжилдэг, заналхийлсэн шинж чанартай байдаг ба охид, бүсгүйчүүдийн өөрийгөө чөлөөтэй илэрхийлэх эрх чөлөөг хязгаарлаж байна" гэж Plan International байгууллагын гүйцэтгэх захирал Энн-Биргитт Альбректсен ярьжээ.
Судалгаанд оролцсон эмэгтэйчүүдийн 20 хувь нь онлайн халдлагаас болж сошиал медиа ашиглахаа больсон бол 12 хувь нь халдлага өртсөний дараа сошиал медиа ашиглах арга барилаа өөрчилсөн гэжээ.
Охид, бүсгүйчүүдийн 40 хувь нь Фэйсбүүк орчинд халдлагад өртөж байсан гэж хариулжээ. Мөн Инстаграм, Твиттер, ТикТок, Снапчат зэрэг бусад платформд ч ижил асуудал тулгардгийг ярилцлагад орсон эмэгтэйчүүд дурдсан байна.
Түүнчлэн судалгаанд оролцогчдын 30 орчим хувь нь үндэсний цөөнх, 56 хувь нь ЛГБТ гэдгээсээ болж халдлагын бай болж байжээ.
Онлайн халдлагын улмаас эмэгтэйчүүдийн 25 хувь нь бодит амьдрал дээр айдас, түгшүүр мэдэрдэг болсон гэжээ.
Эх сурвалж: The Guardian