"Копа Америка-2024" эхний хагас шигшээд Аргентин "хоккейн орны" хөлбөмбөгчдийг 2:0 -ээр хожин финалд хүрлээ. Энэ тэмцээний нээлтийн тоглолтод Аргентин-Канад тоглож, Аргентин мөн л 2:0-ээр хожсон. Альварес ч бас гоол хийж байсан. Харин Месси энэ тэмцээнд анхны гоолоо оруулж, шүтэн бишрэгчид болон Ист Рутерфорд хотын "MetLife" цэнгэлдэхэд ( Энэ цэнгэлдэхэд 2026 оны ДАШТ-ий финалын тоглолт болно) цугласан 80,000 үзэгчдийг баярлууллаа.
Дэлхийн аваргууд ийнхүү дэндүү дардан замаар ( Канад(2), Чили, Перу, Эквадортой тоглосон) явсаар "Копа Америка-2024" шигшээ тоглолтод хүрлээ.
Финалд тэд 27 тоглолт дараалан хожигдол амсаагүй яваа "ганган" тоглолттой Хамес Родригесийн ахалсан "гоёхон" Колумби, мөн "El Loco" ( Галзуу) хочит алдарт мэргэжилтэн Бьелсагийн удирдсан дайчин Уругвайн аль ялсантай "нүүр тулна".
Ц.Энхтүвшин Таван цагариг сонин
