2024 он гараад аль хэдийн найман сар өнгөрчээ. Нэг л мэдэх нь ээ шинэ жил, шинэ бүхний эхлэл ирэх цаг мөч ирнэ. Иймд хүлээлт үүсгэлгүй энэ ондоо багтаж сэтгэл мэдрэмжээ анагаан, өөрийгөө хайрлахад суралцацгаая…
Хүнд байдаг хамгийн бодит эрдэнэ бол бие цогцос бус дотоод ухамсар билээ. Угаас үзэсгэлэнтэй хорвоо ертөнцийг цогцлооход гоёмсог байшин, харш, ганган хүмүүс хэрэггүй. Үзэсгэлэнтэй сэтгэл, тунгалаг оюун л хэрэгтэй. Харах өнцөг сайхан байж гэмээ нь хүрээлэн буй орчин өөрчлөгдөх нь мэдээж. Иймд харах өнцгөө өөрчлөхийн тулд хамгийн түрүүнд өөрийгөө эдгээх, хайрлахад суралцах хэрэгтэй юм шүү.
Өөртөө итгэлгүй байдал
Яг үнэндээ чи өөрөө өөрийнхөө өө сэвийг бусдад хэлэх хүртэл тэр бүр анзаарагдаад байдаггүйг мэдэх үү? Майга хөл, уруулан дээрх мэнгэний үс, сэвх, хугарсан үс зэргийг чинь өдөр тутамд толинд хардгаараа та л анзаарч хардаг гэдгийг санах хэрэгтэй. Иймд гадаад төрхдөө зовних бодлоо яг одоо халж хая. Мөн сэтгэхүйн хувьд би энийг чадахгүй байх, би азгүй хүн гэх хохирогчийн сэтгэхүйг ч мөн адил гээх хэрэгтэй. Оронд нь өөрийнхөө бүхий л сул талыг хүлээж авч тэврээрэй.
Бодит бус хүлээлт
Бид 1000 наслахгүй. Нөгөөтээгүүр цаг хором өнгөрөхийн хэрээр юмс хувьсан өөрчлөгдөж байдаг гэдгийг ойлгох хэрэгтэй иймд өөрт тавьсан бодит бус хүлээлтүүдийг орхиорой гэж зөвлөе. Хамгийн бодит зүйл бол одоо цаг юм шүү. Ирээдүйд ирэх өөрчлөлтүүд зөвхөн чамаас бус олон зүйлийн хүчин нөлөөгөөр өөрчлөгдөг буй учир хүлээлт тавиад байлгүй өөртөө итгэ. Хэрэв энэ зүйлийг энэ ондоо багтаж ойлгож чадвал 2025 онд таныг олон гайхамшиг хүлээж байна гэдгийг амлаж байна.
Амар тайвныг алдагдуулдаг хүмүүс
Хүрээллээ цэвэрлэх буюу нөхөрлөл, хайр сэтгэл зэрэг хүн хоорондын харилцаанд улаан шугам тавьж сурах нь чиний сэтгэл зүйд 100% эергээр нөлөөлөх болно. Иймд ирэх жилийнхээ сэтгэцийн эрүүл мэнд, амар амгаланг одооноос бэлдэцгээе.
Хов жив
Хов жив чамд саарыг авчирна уу гэхээс сайныг хэзээ ч авчрахгүй. Угаас ихэнх хов жив дэгсдүүлэлтэй байдгийг бид бүхэн сайн мэднэ. Иймд яг одооноос хов живд ч ач холбогдол өгөхөө больцгооё. Мөн чиний талаар хүмүүсийн ярьсан зүйлсийг ч тоох хэрэггүй дээ.
Өөрийгөө буруутгах
Өөрийгөө буруутгах бол хамгийн хор хөнөөлтэй, бие сэтгэлийг чинь дотроос нь идэх бодол юм. Ялангуяа болоод өнгөрсөн юм дээр өөрийгөө буруутгаад хэрэггүй дээ. Чи тэрхэн хугацаанд хамгийн боломжит хувилбарыг л сонгосон шүү дээ. Мөн бусдын өмнөөс үүрэг хүлээх, тэдэнд үйлчилж чадаагүй дээ өөрийгөө буруутгах хэрэггүй. Чи хангалттай сайн байсан.
Төгс төгөлдөр байх
Дээрх бүгдийг цогцлоогоод дурдваас эдгээр хүлээлт, сэтгэлийн зовнил нь эцэстээ сайн хүн байхын төлөө, төгс төгөлдөр байхын төлөөх дарамтаас өөрийгөө чөлөөлөөрэй. Угтаа юу ч төгс бишээс гадна хорвоо ертөнц өө сэвтэйгээ үзэсгэлэнтэй юм шүү.
