АНУ-ын Ерөнхийлөгч асан Доналд Трампын охин Иванка өнөөдөр 43 нас хүрлээ. Аавыгаа Ерөнхийлөгч байхад зөвлөхөөр нь ажиллаж байсан Иванкаг одоо бизнес эрхлэгч, зохиолч, фотомодель гэж хэлж болно. Тэрээр 2009 онд саятан Жаред Кушнертэй гэрэлсэн. Хосууд Арабелла Роуз гэсэн охин, Жозеф Фредерик, Теодор Жеймс гэдэг хоёр хүү, нийт гурван хүүхэдтэй. Иванка гэрлэхээсээ өмнө Иудейн шашин буюу иудаизмд орж, Яэль гэдэг еврей нэртэй болсон.
Ингээд түүний амьдралын дүрмээс танилцуулья.
“Эмэгтэй хүн ажил дээрээ гэрэлтэж байгаасай гэж би хүсдэг”
“Амьдрал гэдэг ойрын зайн уралдаан биш марафон. Тиймээс алс хэтийн төлөвлөгөө зохио”
“Гэртээ би босс биш, ээж, эхнэр, айлын эзэгтэй”
“Манай эмээ нар ажил хийхийн төлөө тэмцэж байсан. Харин ээжүүд минь ажиллах уу, гэртээ суух уу гэдгээ өөрсдөө сонгодог болохын төлөө тэмцсэн. Харин бид бол амьдралын олон талаас өөрсдөө үнэн таашаал авч чадах анхны үе юм”
“Миний хувьд гэрбүл нэгт байдаг. Хамтдаа хооллож, амралтын өдрүүдээ цугтаа өнгөрөөдөг. Хоёрдугаарт, ажил. Офист би тэнд хийж болох бүх ажлаа хийгээд үлдсэнийг нь гэртээ авчирдаг. 11 цагт хүүхдүүдээ унтуулаад компьютерийн ард сууж, ажлаа хийнэ. Би өдөрт 4-5 цаг л унтдаг”
“Ажиллаж байгаа эмэгтэй хүн сайхан. Идэвхтэй эмэгтэй байхын сайхныг бичдэг тусгай сайт надад бий”
“Мэдээж би эцэгтэйгээ санал зөрөх зүйл бий. Түүний хэлсэн үг бүртэй санал нэг байна гэвэл харин хачирхалтай санагдах байх”
“Би “Trump Organization”-ийг удирдаж байна гэдэг л манай аав эмэгтэйчүүдэд сайн ханддагийг харуулж байна”
“Бизнес бол марафон. Авьяас чадвартай ч замын голоос гарсан олон хүнийг би мэднэ. Харин тэднээс сул ч хөдөлмөрлөсөөр байгаад зорилгодоо хүрсэн хүмүүс олон бий”
“Түншээ зөв сонго. Өөрийгөө ойлгодог хүнтэй л харилц. Нөхөр минь миний мэргэжлийн хүслийг ойлгож, дэмжихгүй байхыг огт төсөөлөхгүй байна”
“Би өөдрөг үзэлтнүүдэд дуртай. Гутранг үзэлтнүүд таныг намагт живүүлнэ”
“Эмэгтэйчүүд төдийгүй эрчүүд ч өөрчлөгдсөн. Одоо эрчүүд өөрсдийн аав нараас илүү хүүхдүүдийнхээ дэргэд байхыг хүсдэг болсон”
“Гэрбүлийнхнийхээ дэмжлэгтэйгээр л амжилтад хүрсэн гэж намайг шүүмжилдэг. Би тоодоггүй. Яагаад гэвэл тэдний зөв”
“Ажил хэргийн уулзалтад амжилт олохын тулд сайн бэлтгэ. Ярианы сэдвээ судлаж, уулзалтаас өмнө ирж, үзэг дэвтрээ бэлтгэ”
“Товч тодорхой ярь. Илтгэл тавихдаа “ойролцоогоор”, “гаруй” гэх зэрэг үг хэрэглэж, 20-40 хувь гэж ярьж болохгүй. Тоо хэлмээр байвал тодорхой тоо хэл”
“Бизнес уулзалтын өмнө би цаасан дээр зорилгоо бичдэг. Энэ уулзалтаас би юу олох вэ гэдгээ тодорхой мэдэж байх хэрэгтэй”
“Хийж байгаа ажилдаа дуртай бай. Тэгэхгүй бол та дээд түвшинд өрсөлдөж чадахгүй”
“Эвгүй байдалд орж, сэтгэл үймрэхэд би уртаар амьсгалдаг. Амьсгаагаа хяна. Гар утсаа оролдоод “байдалд орсноо” мэдэгдэлгүй, биеэ сул тавьж амьсгалдаг”
“Би амжилтад хүрэх гэж тэмүүлдэггүй, аз жаргалтай болох гэж зүтгэдэг. Миний хувьд аз жаргал бол нөхөр, хүүхэд болон зорилгодоо хүрэх”
“Амар арга олно гэдэг сайн зүйл биш байж ч мэднэ”
