Дэлхий ертөнцөд итгэл найдвар хайрласан 2025 он ирлээ. Шинэ 2025 он солонгос хөгжмийн ертөнцөд жинхэнэ өрсөлдөөний жил байх болно. К-Поп зах зээл дээрх хүчний харьцааг хааш нь ганхуулж мэдэх маш том өөрчлөлтүүд биднийг хүлээж байна. Бодоод үз л дээ, BTS хамтлаг арми, цэргийн дараа бүрэн бүрэлдэхүүнээрээ цугларах бол SM Entertainment агентлагийн 30 жилийн ой, BLACKPINK эргэн ирэлт, NewJeans охид хаачих вэ гээд л. Ёстой л солонгос драм шиг үйл явдлууд ээлж дараалан болно.
SM Entertainment агентлаг 30 жилийн ойгоо хоёрдугаар сарын 14-нд асар том ёслолоор тэмдэглэх гэж байна. Ойг угтан, нэгдүгээр сард “Gocheok Sky Dome”-д 50 мянган үзэгчийн өмнө “All Your Dreams” тоглолт болно. Тайзан дээр БоА, TVXQ, aespa болон к-поп хөгжмийн анхны үеийн Tony Ahn, Bada гэсэн “ахмадууд” ая дуугаа өргөнө. Энэ агентлаг H.O.T., БоА, TVXQ, EXO, aespa гэсэн хамтлагуудыг гаргаж, к-поп урсгалын хөгжилд үнэтэй хувь нэмэр оруулсан. Онлайн тоглолт, дэлхий тойрсон сонгон шалгаруулалт, бүтээл туурвих кампус гээд маш олон шинэ зүйл нэвтрүүлсэн түүхтэй. Тэдний ойд уригдсан, уригдаагүй гээд хэл ам их байх нь гарцаагүй.
Энэ оны эхний улиралд SM агентлаг охидын шинэ хамтлагаа танилцуулна. Аespa-гаас хойш таван жилийн дараа гаргасан охидын хамтлаг нь гишүүдээ сонгож, нэрээ аваад, анхны дуу, клипээ бэлтгэчихсэн байгаа.
БНСУ-ын эдийн засагт жилд хэдэн тэрбум ам.долларын ашиг оруулдаг байсан алдарт BTS хамтлаг гишүүд нь цэрэгт алба хаасаар бүрэн бүрэлдэхүүнээр цуглараагүй удсан. Ирэх зургаадугаар сард сүүлийн гишүүн нь цэргээс халагдахад уран бүтээлээ дахин эхлүүлэхээр бэлтгэл ажилдаа орцгоосон. Шинэ цомог гаргаж, дэлхий тойрсон аялан тоглолт хийнэ. BTS хамтлагийн эргэн ирэлт эдийн засгийн ашгаас гадна к-поп хөгжмийг дэлхийд түгээхэд шинэ түлхэц болж өгнө гэж шинжээчид хүлээж байна.
Хоёр жил гишүүд нь хувийн уран бүтээлээ хөөсний эцэст BLACKPINK хамтлаг дахин цугларна. Ирэх тавдугаар сард шинэ цомгоо гаргаад тэд Ази, Хойд Америк, Европыг тойрсон дэлхийн хэмжээний аялан тоглолт хийх болжээ. Тэдний эргэн ирэлт ч к-поп хөгжмийн түүхэнд шинэ хуудас нээхүйц үйл явдал болох нь дамжиггүй.
Stray Kids хамтлаг Billboard 200 чансаанд зургаа дараалан тэргүүн байр эзэлж, К-поп ертөнцийн лидер, тэргүүлэгч байр суурийг эзэмшээд байгаа. 2025 онд тэд Хойд Америкийн том цэнгэлдэх хүрээлэнгүүдэд тоглолт хийж, дэлхийг тойрох болно. Товчхон хэлэхэд, солонгос хөгжмийн лидер гэдгээ баталсаар байх болно.
SEVENTEEN хамтлаг 10 жилийн ойгоо шинэ цомог, аялан тоглолтоор тэмдэглэнэ. Гэхдээ 2025 оны эхний хагаст зарим гишүүд нь армид алба хааж байх тул бүрэн бүрэлдэхүүнээр тоглож чадахгүй.
JYP Entertainment агентлаг нэгдүгээр сард Kickflip хэмээх хөвгүүдийн шинэ хамтлагтай болно. Энэ хамтлагийн гол онцлог нь гудамжны бүжиг, скейтбординг. Бүх гишүүд нь скейтбордингийн мэргэжлийн тамирчид гэдгээрээ бусдаас ялгарна.
YG Entertainment зах зээлийн нөлөөгөө хадгалсаар байна. 2024 онд BABYMONSTER-ийг амжилттай “эх барьснаас” хойш шинэ жилдээ тэд хип-хоп, R&B гоцолсон шинэ хамтлаг бэлтгэж байгаа.
Өнгөрсөн онд шуугиан тарьж, энэ жил ч дуулиан нь дуусаагүй байгаа HYBE болон ADOR”ын тэргүүн асан Мин Хи Жиний шүүх хурал, NewJeans хамтлагийн гэрээгээ цуцалсан сэнсаац энэ жил ч олны анхаарлыг татна. Учир нь агентлагтайгаа ингээд гэрээгээ цуцалж болдог юм байна гэдгийг харуулах юм бол к-поп ертөнцөд 30 жил ноёрхсон “агентлаг артистийг бүрэн эзэмшдэг” явдал ганхаж, агентлаг, продюсеруудын эрх мэдэл суларч эхлэх учиртай.
