ChatGPT-г бүтээсэн хиймэл оюуны OpenAI компани Солонгосын тэргүүлэх чат аппликейшн Kakao-тай хамтран ажиллах болсноо зарлалаа. Kakao бол Солонгосын зах зээлийн 97 хувийг эзэлдэг мессеж апп төдийгүй цахим худалдаа, тоглоом, төлбөр тооцооны салбарт ч томоохон байр суурь эзэлдэг. Тэдний хувьд сүүлийн үед хиймэл оюуны тал дээр дотоодын гол өрсөлдөгч Naver-ийн ард хоцорсон гэж шинжээчид дүгнээд байсан бол ийнхүү томоохон алхмыг авчээ.
OpenAI-ийн хувьд тэд Kakao-тай хамтарснаар Азийн зах зээлд өндөр түвшний хоёр дахь хамтрагчаа оллоо гэсэн үг. Тэд АНУ-ын ерөнхийлөгч Доналд Трамп ажлаа эхлүүлсний дараахан Японы SoftBank-тай хамтран ажиллахаар болсноо зарлаад байсан юм. OpenAI-ийн захирал Сэм Алтман энэ удаад Сөүлд зочлохдоо ч бас SoftBank-ийн Гүйцэтгэх захирал Масаёши Сон болон Samsung-ийн захирал Ли Жэ Ёнтой уулзах хуваарьтай байгаа гэжээ.
БНСУ-ын хувьд хиймэл оюуны боловсруулалтад хэрэглэгддэг өндөр чадалт чип үйлдвэрлэдэг төдийгүй энэ салбарт хүчтэй тоглогч болохоор зэхэж байна. Сэм Алтман ч мөн АНУ дахь Stargate data centre төслийн экосистемийг бий болгоход нь Солонгосын компаниуд онцгой үр нөлөөтэй гэж онцолжээ.
