Эмэгтэйчүүдийн эрхийн төлөө тэмцэгчдийн цогтой тэмцлийн ачаар хэн ч тайзан дээр гарч алхах эрхтэй болоод байгаа. Энэ хөдөлгөөн сахиусан тэнгэрүүд нь яагаад бүгд урт хөлтэй, тэгшхэн биетэй байдаг юм гэж заргалдсаар алдарт “Victoria’s Secret”-ийг зургаан жил хаалгаж чадсан эрх мэдэлтэй эрхмүүд. Ингээд сүүлийн бараг бүх Загварын шоунд Plus Size хөвсгөр модель заавал гардаг болсон. Тэдний гэрэл зургийг том сэтгүүлүүд нийтэлж, зар сурталчилгаанд ч байнга гардаг болжээ.
Эшли Грэм (Ashley Graham)
1987 онд төрсөн. Небраска мужийн уугуул. 12 настай байхад нь I & I агентлаг түүнийг анх олж харсан юм. Сэтгүүлд зураг авхуулж байгаад 2010-аад оноос Levi's, Marina Rinaldi брэнд, Америкийн том хүнсний дэлгүүрүүдийн зар сурталчилгаанд тоглож эхэлсэн. 2012 онд Нью-Йоркт том биетэй эмэгтэйчүүдэд зориулсан хувцас үйлдвэрлэгч Lane Bryant брэндийн сурталчилгаанд гарснаар алдартай болсон. Sport's Illustrated сэтгүүлтэй 2016 оноос хамтран ажиллаж байна. Телевизийн хөтлөгч хийж, 2017 онд өөртөө итгэлтэй байх талаар ном гаргасан. Энэ сард Эшли Грэм Бродвейд “Чикаго” мюзиклд Рокси Хартын дүрийг бүтээнэ.
Палома Эльсессер (Paloma Elsesser)
Ээж нь өнгөт арьст америк эмэгтэй, аав нь чили, швейцар цус холилдсон. Палома 1992 онд Лондонд төрсөн ч Калифорнийд өссөн. 2010 онд New School их сургуульд утга зохиол, сэтгэл зүй судлахаар Нью-Йоркт ирсэн. Гэвч түүний олон нийтийн сүлжээн дэх зургийг Пэт Макграт олж харснаар амьдрал нь өөрчлөгджээ. 168 см гэсэн намхан нуруутай ч Ferragamo, Fendi, Marni, Victoria's Secret гэсэн брэндүүдтэй хамтран ажилладаг. 2023 онд Палома “Оны шилдэг модель” болсон анхны Plus Size загвар өмсөгч болж байлаа.
Жилл Кортлев (Jill Kortleve)
Нидерландын уугуул, 31 настай Жилл 2018 онд “Alexander McQueen” брэндийн нүүр царай болж, тодорсон. 2020 онд Парисын Загварын 7 хоногийн шоунд Chanel-тай хамтран ажилласан. Michael Kors, Fendi, Jacquemus, Valentino, Mugler брэндийн тайзнаас гадна янз бүрийн улсын Vogue сэтгүүлийн нүүрэнд тогтмол гардаг.
Кэндис Хаффин (Candice Huffine)
Өнгөрсөн жил 40 нас хүрсэн. Замналынхаа турш маш олон салбарт анхдагч болж байсан эмэгтэй. Сургуульд сурч байхдаа Гоо бүсгүйн тэмцээнд түрүүлж, 16 настайдаа моделийн анхны гэрээгээ байгуулж байв. Кэндис Victoria's Secret-ийн байнгын зочин. 2015 онд Pirelli хуанлид гарсан анхны Plus Size модель болсон. 2016 онд эмэгтэйчүүдэд гүйлтээр хичээллэхэд нь туслах Project Start нийгэмлэг байгуулсан.
Тесс Макмиллан (Tess McMillan)
Хамгийн залуу, хамгийн хурц хөвсгөр моделийн нэг. 1999 онд Техаст төрж, дараа нь Нью-Йоркт шилжин амьдарсан. 2018 онд моделийн бизнест хөл тавьсан. Өвөрмөц төрхтэй тул түүнийг Pre-Raphaelites модель гэж нэрлэдэг. Үнэхээр дахин сэргэлтийн үеийн эмэгтэй мэт харагддаг. Загвар өмсөхөөс гадна уран зураач хүн. 2023 онд Парист үзэсгэлэнгээ гаргаж байв. Хоёр кинонд тоглосон жүжигчин.
Прешес Ли (Precious Lee)
Том тайзанд гарч чадсан цөөхөн өнгөт арьст Plus Size моделийн нэг. 1989 онд Атлантад төрсөн. Багаасаа загвар сонирхдог байжээ. 18 настайдаа анхны гэрээгээ байгуулсан. 2017 онд Christian Siriano шоунд анх гарсан. Дараа нь Tommy Hilfiger, Balmain, Versace, Michael Kors, Moschino, Jean Paul Gaultier гээд үргэлжилсэн.
Дениз Бидо (Denise Bidot)
Ээж нь Пуэрто Рико,аав нь Кувейтээс ирсэн хүмүүс. Ээж нь залуудаа загвар өмсөгч болохыг мөрөөддөг байсан ч жингээ хасаж чадалгүй больжээ. Дениз Бидо жүжигчин болохоор 18 настайдаа Лос-Анжелес хотод ирсэн ч амжилт олсонгүй. Харин энэ үед түүнийг нэгэн гэрэл зурагчин олж харан, санал тавьснаар модель болсон түүхтэй. 2016 онд “Зөв биш эмэгтэй гэж байдаггүй” хэмээх хөдөлгөөн үүсгэн байгуулсан.
Альва Клэр (Alva Claire)
Альва 18 настайдаа Plus Size моделиудтай хамтран ажилладаг агентлагтай гэрээ байгуулсан ч ажил олдсонгүй. Ингээд орчин үеийн хувцасны загварын шинжээчийн ажлаа орхиод Нью-Йоркт ирсэн тэрээр тэр дороо тайзанд гарсан. 2019 онд “Rihanna's Savage x Fenty show”-нд шар хувцастай гарч, олны анхаарлыг татсан. Энэ өдрөөс хойш түүнд ирэх ажлын санал тасраагүй.
Юми Ню (Yumi Nu)
Япон, голланд гаралтай Юми 1996 онд Нью-Жерсид төрсөн. Ээж нь загварын ертөнцийн хүн байсан тул багаасаа модель бизнест орсон. Гэхдээ модель болохоосоо өмнө дуу зохиодог байлаа. Нэг цомогтой гэж байгаа. 2021 онд Юми Ню Sport's Illustrated сэтгүүлийн тусгай дугаарын нүүрэнд гарсан анхны ази гаралтай плюс-сайз модель болсон юм.
Хантер Макгрейди (Hunter McGrady)
Жүжигчин Майкл Макгрейди, модель Бринья Макгрейди нарын охин. 15 настайдаа жирийн модель болох гээд амжилт олоогүй Хантер 19 настайдаа “плюс-сайз” зэрэглэлд шилжсэн. Макгрейди бол Sport's Illustrated сэтгүүлд гарсан хамгийн том биетэй модель. Тэрээр XXS - 5X хэмжээтэй хувцасны All Worthy гэсэн сүлжээтэй.
