Ub.life-ийн редакц Fat Cat жазз клубтэй хамтран зохион байгуулдаг “Poetry Night” арга хэмжээгээ энэ удаа утга зохиол судлаач, сэтгүүлч У.Бямбанямын “Дурсамжийн газрын зураг” номоос сэдэвлэн хийлээ. Зохиолч У.Бямбаням нь зургаан жилийн өмнөөс их зохиолч Д.Нацагдорж болон баруунд сурахаар одсон анхны монгол хүүхдүүдийн жимээр Улаанбаатараас Берлин хүртэл судалж, аялж “Найрагчийн мөрөөр” төслөө эхлүүлсэн бөгөөд өнгөрсөн хугацаанд 10 гаруй цуврал нийтлэл, 2 цуврал баримтат кино бүтээгээд байсан юм. Харин “Дурсамжийн газрын зураг” зүймэл роман нь эл төслөөс гарсан цоо шинэхэн уран бүтээл юм.
Тэрбээр өөрийгөө эрэх аяллаас үүдсэн төслийн санаа нь баяжиж явсаар 1920-иод оны Монголын оюун санаанд шинэчлэл, эрх чөлөөг авчирсан залуусын жимээр орж, улмаар тэдний туулсан хэлмэгдүүлэлтийн хүнд хэцүү тавиланг судлах болсоор өдгөө 100 жилийн дараа бидний ёс төдий дурсдаг түүхийн гашуун үнэнийг уран зохиол, сэтгүүл зүйн хосолмол аргаар уншигчдадаа барьсан нь энэ.
“Poetry Night”-ийн тайзнаа зохиолч төсөл эхлүүлсэн үүтгэл санаа, бүтээл туурвих судалгаа хэрхэн хийгдсэн, бүтээл болоод зохиогч өөрөө энэ хугацаанд хэрхэн хувьсан өөрчлөгдөв, эл бүтээлээр юуг хүргэх болов гэхчлэн олон сонирхолтой асуултад хариулж, хүрэлцэн ирсэн зочидтой халуун дулаан, амттай яриа өрнүүллээ. Мөн зохиолын хэсгээс уншин толилуулснаас гадна номд зориулж бүтээсэн хөгжмийн бүтээлүүдээс ч хуваалцан сонирхуулсан юм.
Арга хэмжээний хоёрдугаар хагаст зохиолчийн сонгосон их зохиолч Д.Нацагдоржийн шүлгүүдээс танхимд цугласан зочид дуудаж сонордуулав. Д.Нацагдоржийн олон түгсэн хэзээний танил бүтээлүүдээс илүүтэй Монголын уран зохиолд дэвшил, шинэтгэлийг авчирсан бүтээлүүдийг сонгосон нь сонирхолтой бөгөөд дуудсан шүлэг бүрийг утга зохиол судлалын үүднээс таниулж, тайлбарласан нь онцлог байлаа.
Энэ удаагийн “Poetry Night” Д.Нацагдоржийн дуулах дуртай дуу хэмээн нөхдийнх нь тэмдэглэлд үлдсэн “Цэнхэрлэн харагдана” дууны аялгууг Үндэсний урлагийн их театрын морин хуурч С.Дарханбаярын хөгжимдсөнөөр эхэлсэн бол төгсгөлд нь Д.Нацагдоржийн шүлгийг дэлхийн олон орны хэлээр уншигчид нь дуудсаныг чагнаснаар өндөрлөлөө.
Ub.life уншигчдын арга хэмжээгээ шүлгийн үдэш төдийгүй хөрөг бүтсэн түүх-нийтлэлчийн уулзалт, дууны шүлгийн үдэш-уран бүтээлчдийн уулзалт зэрэг олон хэлбэрээр хийх болсон. Энэ удаад шинэхэн гарсан уран бүтээлийн сэдэвт үдэшлэг хийсэн нь нэн сонирхолтой байсан тул уншигч Та бүхнийгээ дараачийн арга хэмжээнүүдэд маань алгасалгүй оролцохыг урьж байна.
