“Мартахуйн цэл мөсөн доогуур
Санахуйн сул усан жирэлзэнэ” хэмээн бичсэн Төрийн шагналт, Ардын уран зохиолч Сормууниршийн Дашдооровыг “Говийн өндөр” роман, “Холын цэнхэр уулс” тууж, “Бууж мордох хорвоо”, “Оосор бүчгүй орчлон” өгүүллэг, “Өндөр ээж”, “Саруул талын ерөөл”, “Нар хиртсэн жил” кино зохиол, “Амарсанаа” дуурь, “Мартагдашгүй намар” болон “Хөдөөгийн баясгалан” киноны дуу, “Монгол” найраглал, “Сэргэлэн багачууд” хүүхдийн зохиол зэрэг туурвил зүйн бүхий л төрлөөр бичсэн олон зохиол бүтээлээр нь уншигчид таних биз ээ.
Түүний зохиол бүтээлүүдийг Төрийн шагналт зохиолч Дармын Батбаяр “Нүүдэлч малчин монголчуудын уран зохиолыг шимтэн судалдаг юм гэхэд ухааных нь шигшүүрт гарцаагүй тээглэх хүн бол Сормууниршийн Дашдооров” хэмээн үнэлжээ. Харин утга зохиол судлаач Ч.Билигсайхан “Арван хөрөг” номдоо “Уншигч олны хайр итгэлийг С.Дашдооров зохиолч бүрэн даах хүн” гэж тодорхойлсон нь бий.
Зохиолч С.Дашдооровын мэндэлсний 90 жилийн ойг тохиолдуулан түүний уран бүтээлийг судлан, шинжлэх улсын II уралдаан зарлагдлаа.
Анхдугаар уралдааныг 2016 онд явуулахад судлаач Х.Чойдогжамц “Зохиолч С.Дашдооровын бүтээлүүдэд шинээр хандахуй” өгүүллээрээ тэргүүн байрт шалгарсан бол Жа.Баяраагийн “Мандах нарны наагуурх манан хэзээ арилах вэ…”, П.Батхуяг агсны “Зохиолч С.Дашдооровын “Найман түм дөрвөн мянган шалтгаан буюу Бууж мордох хорвоо” өгүүллүүд эхний байруудад эрэмблэгдэж байв.
Сонирхуулахад судлаач Ц.Хасбаатар гуай “Дашдооровт зориулсан нөхөрсөг шогийг яаж зурах вэ гэж хэрэв надаас асуувал ухаан билгийг нь илтгэсэн өргөн магнайгий нь түнтийлгэсхийгээд олон мутарт бурхан шиг хэд хэдэн гартайгаар зураарай гэж хэлнэ. Тэгээд нэг гарт нь шүлэг, нөгөөд нь роман, өөр бусад гарт нь найраглал, тууж, хошигнол, цомнол, кино зохиол, хүүхдийн зохиол гэсэн бичигтэй эрдэнэт үзгийг бариулан дүрслээрэй гэж хэлнэ” хэмээн бичсэн нь бий.
