Хайр дурлал, хосын харилцаа гэдэг сэтгэлийн амар тайван, аз жаргалын эх үүсвэр байж гэмээн бидний амьдралд өнгө нэмдэг. Гэвч заримдаа өөрсдөө ч анзааралгүйгээр хортой харилцаанд орчихсон байх нь бий. Ийм харилцаа сэтгэл зүйд сөргөөр нөлөөлж, өөрийгөө үнэлэх үнэлэмж, амьдралаас авах сэтгэл ханамжийг ч бууруулдаг. Тэгвэл та болон хосын тань харилцаа хэвийн эсвэл хортой эсэхийг хэрхэн мэдэх вэ? Psychology Today сайтын нийтлэлч, сэтгэл засалч Жон Кимийн дүгнэсэн хортой харилцааны таван шинжийг танилцуулъя.
Та үргэлж бүх зүйлд өөрийгөө буруутгаж, уучлалт гуйх ёстой мэт мэдэрдэг
Заримдаа хайртай хүнээ шаналгаж, сэтгэл санааг нь үймүүлэхгүйн тулд өөрийн мэдрэмжээ золиослох тохиолдол хүн бүрт тулгардаг. Харин ямар ч нөхцөлд бүх зүйл таны буруу мэт санагдаж, та уучлалт гуйхгүй л бол асуудал улам дордоно гэж боддог уу? Эрүүл харилцаанд хэн нэгэн нь үргэлж буруутан байх ёсгүй. Аливаа асуудалд хамтдаа шийдэл хайж, харилцан ойлголцож байж хосын харилцаа тогтвортой үргэлжилдэг.
Таны амьдралд хувийн орон зай гэх зүйл байхгүй болж байна
“Чи яг одоо хаана байна? Хэнтэй уулзаж байгаа юм? Юу өмсчихсөн юм бэ?” Энэ асуултууд танд танил сонсогдож байна уу? Хайртай хүндээ аюул тулгарах вий гэж анхаарал халамж тавих нь зүйн хэрэг. Гэхдээ ямар ч зүйлийн хэмжээ хэтэрвэл бурууддаг гэдгийг бид мэднэ. Хэрэв таныг том жижиг янз бүрийн сонголт хийхэд хэт их оролцож, хувийн орон зайг тань хязгаарлаж, бүхнээ тайлагнах нь үүрэг мэт санагдуулж байвал харилцаагаа эргэн нэг харах цаг болжээ. Танд үнэхээр хайртай хүн таныг өөрийнхөөрөө дүүлэн нисэхэд туслах даль жигүүр болохоос таныг торонд хашсан шувуу мэт байлгах ёсгүй.
Өөртөө итгэх итгэлийг тань багасгадаг
Хостой болохоосоо өмнө ямар гал цогтой, эрч хүчтэй нэгэн байснаа хааяа нэг санан дурсдаг уу? Таны хос таныг өөрийгөө голж, өөрийнхөө үнэ цэнийг умартаж сэтгэл санаагаар тогтмол хямрах нөхцөл байдалд хүргэж байгаа бол энэ нь хортой харилцаанд байгааг илтгэх том дохио юм. Өөрийнхөөрөө байхад тань үргэлж шүүмжилж, гоочилдог нэгэнтэй хамт байх шиг шийтгэл өөр хаана байх билээ?
Зөвхөн та л харилцаагаа авч явж байна
Бүх зүйлд та л хичээж байгаа мэт санагдах үе бий. Болзох газраа олох, асуудлын гаргалгааг олох гэж толгойгоо гашилгах, үргэлж түрүүлж буулт хийх гэх мэт. Бүгдээрээ хэлэлцвэл буруугүй гэдгийн үлгэрээр бүх зүйлд хоёр хүн адил тэнцүү сэтгэл, цаг хугацаа, хичээл зүтгэл гаргах хэрэгтэй. Харин зөвхөн та л харилцааныхаа төлөө хичээж байгаа мэт мэдрэгдэж байвал муугийн дохио юм шүү.
Айдас болон дарамт мэдрэх
Хэрэв та харилцаандаа өөрийгөө илэрхийлэхээс айх, мэдрэмжээ хуваалцахаасаа эмээж болгоомжилдог бол хэдийн айдаст суурилсан харилцаанд оржээ. Уурлуулчих вий, бухимдуулчих вий, ингээд хэлчихвэл, ийм юм хийчихвэл тэр юу гэж бодох бол, яаж хүлээж авах бол гэх мэтээр байнга үг хэлж, үйлдэл хийхээсээ өмнө бодолд автана гэдэг хортой харилцааны хамгийн том илрэл.
Цэлмэг тэнгэрээс гэнэт бороо асгачихдаггүй шиг хосын харилцаа нэг л өдөр хортой болчихдоггүй. Энгийн мэт санагддаг жижиг үйлдлүүд даамжирч томорсоор эрүүл бус харилцааг бий болгодог. Хортой харилцааны уршгийг ойлгож танихын тулд өөрөө биеэрээ мэдэрч, шаналахаасаа өмнө өөрийн хил хязгаарыг тогтоож, өөрийгөө хайрлаж сурах хэрэгтэй ажээ. Өөрт хөнөөлтэй харилцаанаас гарч, сэтгэл санаанд тань сөргөөр нөлөөлдөг хүнээс холдож чаддаг байх нь өөрийгөө хайрладаг хүний шинж юм шүү. Хайр өвтгөдөггүй.
Бэлтгэсэн: Б.Цагаандалай
