Судалгаагаар ганцаардал, нийгмээс тусгаарлагдах явдал зөвхөн сэтгэл зүй бус, тархины бүтцэд ч бодит өөрчлөлт авчирдаг болохыг дахин нотолжээ.
Японы эрдэмтдийн баг 65-аас дээш насны 9,000 орчим хүнийг хамруулсан томоохон судалгаанд оролцогчдын тархины дүрс бичлэгийг шинжилжээ. Нийгмийн харилцаа багатай хүмүүсийн тархины эзэлхүүн мэдэгдэхүйц бага, ялангуяа ой санамж, сэтгэл хөдлөлийг хариуцдаг гиппокамп ба амигдала хэсэгт агшилт илэрснийг тогтоосон байна. Мөн цусны эргэлтийн тогтолцооны гажиг, танин мэдэхүйн чадамж буурах зэрэгт нөлөөлдөг цагаан бодисын гэмтэл (white matter lesion) ихээр ажиглагджээ.
Энэхүү судалгаа 2023 оны 7 дугаар сарын 12-нд Neurology сэтгүүлд “Association of Social Isolation With Brain Atrophy and White Matter Lesions in Older Adults” нэртэйгээр нийтлэгдсэн бөгөөд нийгмийн оролцоо ба тархины эрүүл мэндийн уялдааг анхааруулсан хамгийн том судалгааны нэгт тооцогдож байна.
Мэргэжилтнүүдийн үзэж буйгаар ганцаардал, сэтгэл гутрал нь хоорондоо нягт уялдаатай бөгөөд тусгаарлалт, сэтгэл гутрал, тархины доройтол гэсэн мөчлөгийг үүсгэдэг байна.
Эрдэмтэд өндөр настнуудад зориулан өдөр бүрийн харилцаа холбоо, хамтын хобби, нийгмийн үйл ажиллагаанд оролцох, видео дуудлага хийх зэрэг энгийн дадал зуршлууд нь тархины эрүүл байдлыг хамгаалах чухал хүчин зүйл болохыг онцолжээ.
Судалгааны багийн тэргүүн профессор Тошихару Ниномия, “Хүмүүсийн хоорондын энгийн холбоо, өдөр бүрийн яриа, инээмсэглэл, дотно харилцаа нь тархины эрүүл мэндийг хамгаалахад эм шиг нөлөөтэй” хэмээн онцолсон байна.
Хүнтэй харилцах, инээмсэглэх, найз нөхөдтэйгөө уулзах нь зүгээр нэг сайхан мэдрэмж төрүүлэхээс гадна, тархины эрүүл мэндийг хамгаалж, хөгшрөлтийн үйл явцыг удаашруулдаг гэдгийг шинжлэх ухаан баталсаар байна.
