Их Британийн Кингс коллежийн судлаачид түүхэнд анх удаа хүний шүдийг лабораторид ургуулж, шүд нөхөн төлжүүлэх эмчилгээний шинэ аргыг нээлээ. Тэд Лондоны Империал коллежийн судлаачидтай арван жилийн хамтын ажиллагааны үр дүнд шүдний дотоод эс хоорондын өсөлтийг дэмжихэд ээлтэй эдийг бүтээжээ.
Энэхүү нээлт нь шүдний асуудалтай өвчтөнүүдэд ломбо эсвэл хиймэл суулгацаас өөр хувилбар санал болгож, унасан, алдсан шүдээ дахин ургуулах боломжийг өгөх юм. Тэд хүний буйлнаас шүд нөхөн сэргэж ургахад шаардлагатай эдийг лабораторид гаргаж авсан бөгөөд энэ нь хүний шүдтэй яг ижил бүтэцтэй ажээ. Кингс коллежийн доктор Ана Волпони “Энэ нээлтээр шүдний эмчилгээний салбарт хувьсгал хийх боломжтой. Ломбо, имплант суулгацаар шүдийг эмчилж болох ч хамгийн сайн шийдэл биш. Цаг хугацаа өнгөрөх тусам гадны хиймэл суулгацууд шүдийг илүү мэдрэмтгий болгож, бат бөх байдлыг сулруулснаар шүдний өвчлөл дахих нөхцлийг бүрдүүлдэг. Харин лабораторид ургуулсан энэ шүднүүд нь биологийн чанараараа хүний амны хөндийд илүү сайн нийцэж, яг өөрийн жинхэнэ шүд шиг илүү бат бөх байх болно” гэжээ.
Заан, аварга загас зэрэг амьтад байгалиасаа шинэ шүд өөртөө дахин ургуулах чадвартай байдаг бол насанд хүрсэн хүний шүд нөхөн төлжиж ургах боломжгүй юм. Шүдний эмчилгээний салбарт бий болж буй энэхүү томоохон нээлтүүд шүдний өвчлөлтэй хүмүүст тус нэмэр болж чадах ч уншигч та бүхэн өөрийн шүдээ хайрлаж, амны хөндийн эрүүл мэндээ хамгаалаарай. Шүд эрүүл бол бие эрүүл.
Эх сурвалж: BBC News
Бэлтгэсэн: Б.Цагаандалай
