Хайр гэдэг зөвхөн хоёр хүний хоорондын харилцаа биш. Хайрыг эхлээд өөрөөсөө эхлэх ёстой. Хэн нэгнээс ойлголцол, халамж, дэмжлэг хүлээсээр ядарч туйлдсан зүрх сэтгэлд хамгийн түрүүнд хэрэгтэй зүйл бол өөрийгөө дахин нээх, ойлгох үйлдэл юм.
Доорх 8 үйлдэл бол өөртөө хайртай хүн болох эхний алхмууд юм.
1. Өөрийгөө шүүмжлэхээ зогсоо
Бид өөрсдийгөө бусдаас илүү хатуу шүүмжилдэг. Гадаад төрх, амжилт, алдаа дутагдал... Энэ бүхнийг өөртөө зөөлнөөр, өршөөж хандах дадлаар соль. Өөрийгөө хэзээ ч “хангалтгүй” гэж битгий хэл. Чи яг одоо байгаагаараа үнэ цэнтэй.
2. Бие махбоддоо гамтай ханд
Сайхан хоол ид, хангалттай унт, дасгал хөдөлгөөн хий. Биеийн эрүүл мэнд сэтгэлийн тэнцвэртэй холбоотой байдгийг мартуузай. Энэ бол өөрийгөө хайрлаж эхлэх хамгийн бодит алхам юм.
3. “Үгүй” гэж хэлэхээс бүү ай
Хүн бүрийг баярлуулах гэж оролдох нь өөрийгөө мартахын эхлэл. Хүсэхгүй зүйлдээ “үгүй” гэж хэлэх чадвар бол өөртөө хайртай байхын илэрхийлэл. Үнэт цагаа, сэтгэлийн хүчээ зохистой зүйлд зарцуул.
4. Өдөрт дор хаяж 10 минутыг зөвхөн өөртөө зориулах
Өөртэйгөө ганцаараа суух, дотоод дуу хоолойгоо сонсох, дуртай зүйлээ хийх 10 минутын чимээгүй агшин бол өөрийгөө хайрлаж байгаагийн бодит баталгаа. Гар утасгүй, анхаарал сарниулах зүйлгүй, зөвхөн чи өөрөө, тэгээд л болоо.
5. Өөрийгөө уучил
Алдаагаа ахин дахин санаж, өөрийгөө зэмлэх нь хайр биш. Өөртөө “Би тухайн үедээ чадлынхаа хэрээр л хичээсэн” гэж хэл. Уучлал бол сул дорой биш, харин хүчтэй байдлын илрэл юм.
6. Мөрөөдөлдөө хүндэтгэлтэй ханд
Том мөрөөдлүүд ч бай, жижиг хүсэл ч бай бүгдийг нь бич, төлөвлө, хөөцөлд. Чамд зүгээр нэг ажил амжуулах биш, зүрх сэтгэлээ дагах эрх бий.
7. Хил хязгаараа тодорхойлох
Бид ихэнхдээ л бусдыг анхаарсаар өөрсдийгөө хаячихдаг. Харин өөрийн хил хязгаарыг тогтооно гэдэг бол “Би өөрийгөө хүндэлж байна” гэсэн үг. Энэ нь бусдыг түлхэж байгаа биш, харин өөрийгөө авч үлдэж байгаагийн илрэл.
8. Өөртөө зөөлөн үг хэл
“Би чадахгүй юм шиг байна” гэж хэлэхийн оронд “Оролдоод үзье” гэж хэл. “Би дэндүү их дутагдал, өө сэвтэй хүн” гэж бодохын оронд “Би хувьсан өөрчлөгдөж буй хүн” гэж хэл. Хэнээс ч биш, зөвхөн өөрөөсөө сонсох дулаан үгс бол сэтгэлд хамгийн хэрэгтэй бэлэг.
Хайр бол мэдрэмж биш, үйлдэл юм. Өдөр бүр өөртөө жижиг гэлтгүй хайрын үйлдлүүдийг зориулж чадвал, чи хэн нэгнээс хүлээлгүйгээр сэтгэл дүүрэн, тэнцвэртэй амьдрах боломжтой болно.
