Энэ удаа бид найруулагч Майк Кахиллын I Origins (2014) киног 11 жилийн ойд нь зориулж онцолж байна.
Үйл явдал
Амьтдын нүдний бүтцийг судалдаг залуу эрдэмтэн Йен Грэй нэгэн үдэшлэг дээр Софи гэх нууцлаг бүсгүйтэй танилцана. Түүний нүднээс бусадтай харьцуулах аргагүй онцгой өнгө, гэрэл цацарна. Яг л түүнийг ховсдох мэт.
Эндээс тэд анхны харцаар бие биедээ дурлана. Йен зөвхөн шинжлэх ухаанд итгэж, Бурхны оршихуйг няцаахыг хүсдэг бол Софи урьд хойд нас, сүнсний оршихуйд маш их итгэдэг нэгэн. Анх кафед залуу бүсгүйг олж уулзахад л Софи “тэр шөнө би чамайг мэддэг байсан юм шиг, бас чи намайг мэддэг байсан юм шиг хүчтэй мэдрэмж төрсөн. Яг л өнгөрснөөс холбоотой байсан юм шиг” гэхэд залуу “юу гэсэн үг вэ?” гэж асууна. Эндээс л тэдний ялгаатай байдал мэдрэгдэж эхэлнэ. Энэ ялгаа нь тэднийг бие биедээ улам татахын зэрэгцээ хоорондын зайг нь ч улам гүнзгийрүүлдэг.
Гэвч нэгэн харамсалтай ослын дараа Софи өөд болж, Йений амьдрал орвонгоороо өөрчлөгдөнө. Тэр эрдмийн ажлаараа амжилтад хүрч, хамтран ажиллагч Карентэй гэр бүл болж, эцэг эх болдог.Түүний гэргий төрхөд нэгэн хачирхалтай зүйл тэдний гэр бүлд тохиодог нь хүүгийнх нь нүд байлаа. Йен учрыг нь олохоор явах замдаа хайртай байсан бүсгүйнхээ хойд дүртэй уулзах аялалд гарна.
Эсрэгцлийн философи
Хинди болон Буддын шашин зонхилсон эсвэл буддын шашинтай хүн үзээд л энэ киног үзээд л шууд ижил долгисол үүсэхээр кино хэдий ч зөвхөн энэ талаас нь дүгнэвэл хэт өнгөц болох нь ойлгомжтой. Хэдийгээр кинонд хойд, урд нас, итгэл үнэмшил, Энэтхэг гарах хэдий ч үүнийг онцгой болгож буй зүйл гагц тэр биш.
I Оrigin-г онцгой болгож буй хамгийн чухал зүйл бол эсрэгцэл. Бүх зүйлийн эсрэгцэл, үгүйсгэл бас бататгал. Хар, цагаан. Цэнхэр, шар гэдэг шиг. Нийлээд саарал, ногооныг үүсгэнэ.
Хайр ч мөн адил үүсэж бас устаж болдог. Гэхдээ өнгө шиг толбоо заавал үлдээнэ.
Гол дүрийн залуу нүдээ гэмтээсэн үедээ “Софи шиг мухар сүсэгтэнтэй нэг насыг барах юм гэж үү” хэмээн бодсон талаараа киноны дундуур дурддаг. Маш хүчтэй таталцаж, түүнгүйгээр л амьсгалахгүй мэт санагдах ч цаг хугацаа явж биесээ танихын хэрээр хоорондоо тохирохгүй байгааг хүчлэх шаардлагагүйг ойлгоно. Харин ч хурдан тавьж явуулах тусмаа сэтгэлд тайван амгалан болно. Нөгөө хүндээ ч бас нэг төрлийн эрх чөлөөг бэлэглэж байгаа гэх юм уу.
Тоон бэлгэдэл – 11 ба 12
Киноны туршид 11 болон 12 гэсэн тоо дахин дахин гарч ирдэг. Йен 11-р сарын 11-д 11:11 цагт лотерей авдаг. Орчин үеийн философид 11:11 нь “шалтгаангүйгээр холбогдож буй үйл явдлын цаг” хэмээн тайлбарлагддаг гэж Book and Movie Holics пэйж өөрийн хуудаснаа постолжээ. Энэ бэлгэдэлтэй холбоотойгоор 11 жилийнх нь ойд зориулан онцолж буй билээ.
Энэ талаар дэлгэрэнгүй унших бол энэ линк дээр дарна уу.
Уран сайхны шийдэл
Найруулагч Майк Кахилл өмнөх Another Earth бүтээлдээ шинжлэх ухаан ба сүнслэгийн огтлолцлыг ашиглаж байсан ч энэ удаад нүдээр дамжуулан хүний оршихуй, хайр, холбоо магадгүй өөрчлөлтийн тухай дэлгэхээр оролджээ. Хотын гудамжинд яваа хүмүүсийг удаашруулсан кадраар авах, нүдний гэрэл, хээг нь нарны гэрлийн тусламжтайгаар харуулах зэрэг уран сайхны шийдлүүд нь киноны уур амьсгалыг мэдрэхэд маш сайн нөлөөтэй. Radiohead хамтлагийн Motion Picture Soundtrack-н “I will see you in the next life” үг нь эгшиглэх нь бүр ч илүү киноны гоо үзэсгэлэн утга санааг төгөлдөржүүлжээ.
Дүгнэлт
“Хайртай учраад баярладаг, гэхдээ бас гунигладаг. Учир нь эхлэл гэж байдаггүй учраас.” гэж Софи хэлдэг. Энэ өгүүлбэр л киноны гол санааг товчхон илэрхийлнэ. I Origins бол эхлэл ч биш, төгсгөл ч биш – харин бидний итгэл үнэмшлийн нүдээр харсан ертөнцийн өөр нэг өнгө юм. Бас бид бүгдийн харах өнгө өөр. Нийлж, салахдаа ч өөр өнгө бүтээх болно. Тиймээс амьдрал ийм л яруу мэт.
