“Улаанбаатар” кино наадам энэ сарын 18-24-нд болно
Монголын кино урлагийн салбарыг хөгжүүлэхэд хувь нэмэр оруулах, кино уран бүтээлчдийн олон улсын хамтын ажиллагааг нэмэгдүүлэх, дэлхийн нэр хүндтэй наадмуудад шалгарсан кино бүтээлийг Монголын үзэгчдэд хүргэх зорилготой 13 дахь удаагийн “Улаанбаатар” олон улсын кино наадам энэ сарын 18-24-нд Улаанбаатар хотноо болох гэж байна.
Энэ жилийн наадмын онцлох орон ОХУ байх бөгөөд Канн, Берлин, Венец зэрэг дэлхийн А зэрэглэлийн кино наадмын шагналт, 2020-2021 онд бүтээгдсэн Орос, Франц, Герман, Иран, Мьянмар, Швейцар, Энэтхэг, Япон болон Монголын бүрэн хэмжээний 18 уран сайхны кино үзүүлэхээр бэлджээ. Наадмын хүрээнд кино үзвэрээс гадна салбарын уран бүтээлчдийн чадавхыг дээшлүүлж, бүсийн хамтын ажиллагааг өргөжүүлэх зорилготой кино форум, ерөнхий зураачийн ур чадварыг дээшлүүлэх “Авдраа уудал” сургалт зохион байгуулна. Мөн Монголын кино урлагийн түүхэнд бүтээгдсэн шилдэг кино бүтээлийн зурагт хуудсыг дэлгэх “Монгол киноны хөмрөгөөс” үзэсгэлэнг МУЗ-ийн “Улаан гэр” бүтээлч орон зайд гаргах юм байна.
Наадмын зохион байгуулагчид жил бүр Монголын кино урлагийн сор болсон нэг бүтээлийг онцлон толилуулж байхаар тогтсоны дагуу өнгөрсөн жил "Говийн зэрэглээ"-г гаргаж байв. Харин энэ жил нэрт найруулагч Д.Жигжидийн 1959 онд бүтээсэн “Ардын элч” киног онцолж, үндсэн постерын дизайнаа бэлтгэсэн бөгөөд “Үзэхийн хязгаар” хэсэгт тус киног англи хадмал орчуулгатай гаргах аж. Тус кино Москвагийн олон улсын анхдугаар кино наадмын уралдаант хэсэгт шалгарч оролцсон бөгөөд Ариунаагийн дүрийг бүтээсэн жүжигчин П.Цэвэлсүрэн тус наадмаас шилдэг эмэгтэй дүрийн мөнгөн медаль авсан түүхтэй.
Наадмын үзвэрүүд болон кино форум “Тэнгис” кино театрт зохион байгуулагдах бөгөөд наадмын дэлгэрэнгүй хөтөлбөр, кино танилцуулга, кино форум, “Авдраа уудал” сургалттай холбоотой мэдээллийг наадмын албан ёсны фэйсбүүк хуудсаас болонвэб хуудсаас нь аваарай.