Ирэх мягмар гарагийг хүртэл Улаанбаатарт хаашаа очиж, юу үзэх вэ? Та мягмар гараг бүр манай сайтад зочилж, сонин содон, сонирхолтой ямар үйл ажиллагаа нийслэлд маань болж буйг мэдээрэй.
Timeless Times
Монголын контемпорари урлагийн томоохон төлөөлөгчдийн нэг Ё.Далх-Очирын тав дахь бие даасан үзэсгэлэн болох “Timeless Times” үзэсгэлэн ирэх баасан гарагт “Bella Vista” хотхонд байрлах “Q Art Gallery”-д дэлгэгдэх нь. Тус үзэсгэлэнгийн куратораар зураач Л.Ганболд ажиллажээ.
Өмсгөлөө өмсөөд марш
Хэллоуин буюу сүнсний баяр энэ сарын эцэст болохтой холбоотойгоор олон үдэшлэг төлөвлөгджээ. Тэдгээрээс онцлон, “Алтан хальс” кино холбоо, “Кино клуб”, “Cosy Club” хамтран зохиож буй үдэшлэгийг санал болгоё. Киноны дүр дагуу хувцаслаж, кинотой холбоотой хэв маяг бүрдүүлж очих заавартай.
Эрх чөлөөг эрэлхийлэх цаг дор
Талибануудад эзлэгдсэн Кабулд амьдардаг залуу хос Мохсен, Зуниара хоёрын ирээдүйг гэрэлтэйгээр төсөөлөхийг хичээвч амьдрал хүссэнээс нь тэс өөр зүгт түрсээр байх болно. 2019 онд олны хүртээл болсон “Кабулын хараацайнууд” бүтээлийг үзэхийг хүсвэл бямба гарагийн 16 цагт Улаанбаатар чуулгад очоорой.
Монголын сайхан орон
Монголын байгалийн гэрэл зурагчдын нийгэмлэг байгуулагдсаны нэг жилийн ойн хүрээнд тавигдаж буй "Харах өнцөг” үзэсгэлэнг “ХААН Галерей”-гаас үзэх боломжтой. Байгалийн гэрэл зурагчин Б.Баяр, Д.Октябрь, Г.Ган-Өлзий, С.Нацагдорж, Б.Эрдэнэбулган, Ш.Төмөрсүх, Т.Рэгзэн, Э.Ганбаяр болон Ч.Итгэл нарын 70 орчим бүтээл бүхйи эл үзэсгэлэн ирэх ням гарагийг дуустал амжиж үзэж, Монголынхоо сайхан байгалиар аялаарай.
Хэллоуины хошигнол
“UB Comedy”-ийн залуус Хэллоуиний баярыг угтан ирэх лхагва, пүрэв, баасан гарагт тоглох нь. Батаа, Идэрээ, Содоо тэргүүтэй 10 гаруй комедиан тоглох аж. Түүнчлэн ирэх сарын 1-нд 16-21 насныхан орох боломжтой “+16 MONGOLIAN YOUNGSTERZ” шоу болох юм байна.
