1 мин

П.Баярсайханы "Хүн гөрөөс" тайзнаа дахин тоглогдохоор болжээ

Ub.life 2022.01.10

10

1980-аад оны монголын уран зохиолын томоохон төлөөлөгч П. Баярсайханы "Хүн гөрөөс" драмын жүжиг энэ сарын 15-аас "Bee театр”-т тоглогдохоор болжээ. Уг жүжгийг урлагийн гавьяат зүтгэлтэн Б. Мөнхдорж найруулж, Дэлэгийн дүрд Г.Мөнхжаргал, Оюумаагийн дүрд Б.Одгэрэл нар тоглож буй аж.

П.Баярсайханы зохиол бүтээлүүд хэл найруулга, өнгө аяс, утга агуулгаараа онцгой хэв маягийг бүтээж, эрс ялгардаг. Түүнийг дүрүүдийнхээ сэтгэлзүй, дотоод бодролыг нээсэн зохиолч хэмээн утга зохиол судлаачид үнэлдэг юм.

 Дэлэгийн дүрд ажиллаж буй Г. Мөнхжаргал өмнө нь, “Краппын сүүлчийн бичлэг”, “Заратустра”, “Годог хүлээхүй”, “Хэмхэрхий дүрс”, “Овоо” зэрэг 20 гаруй тайз, дэлгэцийн бүтээлүүдэд тоглосон байсан. Түүний найруулсан богино хэмжээний “Сав” кино нь 2017 онд БНХАУ-д зохион байгуулагдсан Олон улсын кино наадмаас “Шилдэг найруулагч”, “Шилдэг кино”-гаар шалгарч байв. Мөн тэрбээр 2014 болон 2020 онд “Гэгээн Муза” Олон улсын театрын наадмаас “Краппын сүүлчийн бичлэг”, “Заратустра” жүжгийн дүрүүдээрээ “Шилдэг эрэгтэй жүжигчин”-ий шагналыг хүртэж байсан.

Харин Оюумаагийн дүрд тоглох Б.Одгэрэл өмнө нь "Эгч дүүс”, “Уучлаарай та дугаар андуурч”, “Жаргаагүй нар”, “Би эндээс явахгүй”, “Кихот ноён”, “Тамын хаалга”, “Хоёр хүний дэмийрэл”, “Фауст”, “Гэм зэм” зэрэг 20 гаруй жүжгийн гол болон туслах дүрд ажиллаж байсан билээ.

"Хүн гөрөөс" жүжиг анх 1991 онд Г. Доржсамбуугийн найруулгаар УДЭТ-д тоглогдож байсан юм. Тухайн үед Дэлэгийн дүрийг гавьяат жүжигчин Ч.Алтан- Өлзий, Оюумаад Ардын жүжигчин С.Сарантуяа, Сугарт жүжигчин Х.Ганхуяг нар тоглож байсан.

Ub.life 2022.01.10

10