Японд зэрлэг сармагчин хүүхэд хөгшчүүд рүү дайрч, 58 хүн гэмтжээ
Японы баруун өмнөд хэсгийн Ямагучи хотод сарманчингууд нялх хүүхэд булаан авахаар оролдож, настай хүмүүсийг хазаж гэмтээн дайрсан тухай "Associated Press" агентлаг мэдээллээ. Долдугаар сарын 8-аас хойш нийт 58 хүн зэрлэг сармагчны халдлагад өртөж, хотын захиргаанаас сармагчны сүргийг тайвшруулах буугаар агнах тусгай баг хүртэл гаргажээ.
Хотын ажилтан "Сармагчингууд хоол хүнс булаан авах гэж оролдохгүй байгаа. Харин нялх хүүхэд, настай хөгшчүүд рүү ихээр дайрч байна. Сармагчин их ухаантай. Тэд ард гэтэж, юмны ард нуугдаж тохиромжтой цагийг хүлээж байгаад голцуу хөл рүү довтолж гэмтээж байна" гэжээ. Хотын захиргаанаас зэрлэг сармагчинтай таарвал харц тулгарахгүй байж, өөрийгөө аль болох том харагдуулан айлгаж, тайван анхааралтай байхыг зөвлөжээ.
Япон хэдийгээр аж үйлдвэржсэн, хот суурин ихтэй улс боловч ихэнх газар нутаг нь ой модод, уулс юм. Баавгай, гахай, сармагчин зэрэг зэрлэг амьтад ихээр байх тул ийнхүү хүмүүс рүү довтолж буй нь ердийн үзэгдэл болохыг хотын захиргаанаас мэдээлж, жуулчид иргэдийг ой мод руу орохгүй байхыг анхааруулаад байна.
Эх сурвалж: Associated Press