Дэлхийн хамгийн өндөр модонд ойртсон хүнийг 5000 доллараар торгоно
Дэлхийн хамгийн өндөр модоор Гиннесийн номд бүртгэгдсэн Хайперионыг жуулчид үзэх боломжгүй болжээ. Калифорнийн Редвуд үндэсний дархан цаазат газраас өнгөрсөн долоо хоногт уг модны ойр орчимд очсон хүн зургаан сар хүртэлх хугацаанд шоронд хоригдож, 5000 доллараар торгуулахыг анхааруулсан мэдэгдэл гаргажээ.
115.92 метр өндөр, 4.84 метр өргөнтэй Хайперион мод нь тус дархан цаазат газрын гүнд ургадаг бөгөөд байгаль судлаачид 2006 онд олж нээснээс хойш жуулчдын хөл тасрахаа больж, өдгөө ноцтой сүйрэлд өртөөд байгаа аж. Хэдийгээр Хайперион мод руу очих зам нэн бартаатай хэдий ч дэлхийн хамгийн өндөр модыг үзэхээр шийдсэн жуулчдын хөлд модны эргэн тойрны эко систем ихээхэн сүйдсэн гэнэ. Мод ёроол хэсгээсээ элэгдэж, хөгширснөөс гадна жуулчид эргэн тойронд нь хогоо хаяж, модны хажуугаар бие засах нь элбэг байгааг дархан цаазат газраас анхааруулжээ.
Байгаль хамгаалах зорилгоор тус бүс нутагт гар утас, GPS-ийн сүлжээг хязгаарласан тул аялж яваад төөрсөн, бэртэж гэмтсэн тохиолдолд тусламж дуудах боломжгүй гэж Редвуд үндэсний дархан цаазат газрын Байгалийн нөөцийн газрын дарга Леонел Аргуэлло мэдээлжээ.
Эх сурвалж: CNN